Almatyda «Nobel Almaty farmasevtıkalyq fabrıkasy» bazasynda búırektiń sozylmaly aýrýy (HBA), júrek jetkiliksizdigi jáne 2-tıpti qant dıabetin emdeýge arnalǵan «Forsıga» preparatynyń jergilikti óndirisi jumysyn bastady. Joba sheteldik ınvestormen birlesip júzege asyrylyp jatyr. Bul týraly Densaýlyq saqtaý mınıstrligi habarlady, dep jazady Egemen.kz.
«Biz «AstraZeneka» halyqaralyq kompanııasynyń Qazaqstanda ınnovasııalyq dári-dármekter óndirisin jergilikti deńgeıde jolǵa qoıý bastamasyn joǵary baǵalaımyz. Kompanııanyń bul jobasy densaýlyq saqtaý jáne ónerkásip salalaryndaǵy memlekettik saıasattyń basym baǵyttaryn, sondaı-aq salanyń turaqty damýyn, zamanaýı jáne tıimdi dárilik zattardyń qoljetimdiligin arttyrýdy kózdeıdi. Osy saıasattyń sátti júzege asýyna mysal retinde 2-tıpti qant dıabeti, júrek jetkiliksizdigi men búırek aýrýlaryn emdeýge arnalǵan «Forsıga» preparaty óndirisiniń iske qosylýyn aıtýǵa bolady. Bul - naýqastardy qajetti terapııamen qamtamasyz etýge múmkindik beretin mańyzdy qadam», dedi QR Densaýlyq saqtaý vıse-mınıstri Tımýr Muratov.
Preparattar 2018 jyldan bastap ambýlatorııalyq tegin dárilik qamtamasyz etý tizimine engizilgen. Qazirgi tańda 2 mıllıonǵa jýyq qazaqstandyq HBA dıagnozymen tirkelgen, bul degenimiz Qazaqstanda árbir onynshy adamǵa gemodıalız qajet degendi bildiredi. Jobaǵa qazirgi tańda 5 mln dollar ınvestısııa quıylsa, 2030 jylǵa qaraı bul kórsetkish 40 mln dollarǵa jetpek. Sarapshylardyń pikirinshe, óndiristiń lokalızasııasy otandyq naýqastardy úzdiksiz jáne sapaly terapııamen qamtamasyz etýge múmkindik beredi.
«Qazirgi tańda elde 15 myń naýqasqa terapııa qajet. Olardyń ishinde jastar da kóp. Termınaldyq kezeńde naýqastardyń 35–40%-y jasandy búırek apparatyna táýeldi bolady. Bul naýqastardyń kópshiligi arterııalyq gıpertenzııa jáne qant dıabetimen aýyratyndar. Endi Qazaqstanda tıimdiligi dáleldengen, aýqymdy zertteýlerden ótken, senimdi jáne otandyq deńgeıde óndiriletin preparatty qoldaný múmkindigi bar. Bul- biz jáne bizdiń pasıentter úshin óte mańyzdy qadam», dedi QR bas shtattan tys nefrology, professor Týǵanbekova Saltanat.
Aıta ketý kerek, bul joba 2020–2025 jyldarǵa arnalǵan farmasevtıkalyq ónerkásipti damytý jónindegi keshendi jospar aıasynda júzege asyrylýda jáne Qazaqstan, Ulybrıtanııa men Shvesııa arasyndaǵy ınvestısııalyq áriptestiktiń jarqyn úlgisi bolyp otyr.
Alına Qaıratqyzy,
EUÝ 2-kýrs stýdenti