Bul týraly Eńbek jáne halyqty áleýmettik qorǵaý mınıstrligine qarasty Áleýmettik kómek departamentiniń dırektory Asqar Aımaǵambetov Ortalyq kommýnıkasııalar qyzmeti alańynda ótken dóńgelek ústel barysynda aıtty, dep habarlaıdy Egemen.kz.
Spıker Asqar Ábildaulynyń aıtýynsha, respýblıkalyq bıýdjetten tólenetin járdemaqylardyń bes túri jáne memlekettik áleýmettik saqtandyrý qorynan tólenetin eki áleýmettik tólem túrleri bar, atalǵan tólemderdiń barlyǵy otbasynyń tabysyna qaramastan beriledi. Elimizde 2,1 mln otbasyǵa tólemder beriledi. Bıyl bul tólemderge 1,7 trln teńge qarjy qarastyrylǵan. Byltyrǵy jylmen salystyrǵanda 210 mlrd teńgege artyq. 2025 jyldyń 1 qańtarynan bastap memlekettik járdemaqylar men tólemderdiń barlyǵy 6,5%-ǵa ósken.
OKQ baspasóz qyzmetiniń málimdeýinshe bazalyq deńgeıde memleket respýblıkalyq bıýdjetten 149 myń teńgeden 247 myń teńgege deıingi birjolǵy bala týylýyna baılanysty memlekettik járdemaqyǵa kepildik beredi. 2025 jyldyń 4 aıynda 137 myń otbasyǵa 21 mlrd teńgeden astam qarajat tólendi. Osy jylǵa qarastyrylǵan qarajat kólemi – 75 mlrd teńge.
Jumys istemeıtin áıelder úshin 1,5 jasqa deıingi bala kútimine baılanysty járdemaqylar bar. Olar 22 myń teńgeden bastap 34 995 teńgege deıingi mólsherde beriledi. Máselen, birinshi balaǵa – 22 649 teńge, ekinshi balaǵa – 26 777 teńge, úshinshi balaǵa – 30 866 teńge, tórtinshi jáne odan keıingi balalarǵa – 34 995 teńgeden tólenedi. 1 mamyrdaǵy jaǵdaı boıynsha 123 myń otbasyǵa 14,5 mlrd teńge somasynda járdemaqy berilgen.