Qorǵanys mınıstrliginde alǵash ret áskerı qyzmettiń belgilengen merzimin abyroımen ótkergen sarbazdarǵa elimizdiń jetekshi joǵary oqý oryndarynda oqýǵa memlekettik bilim granttary saltanatty jaǵdaıda tabystaldy, dep habarlaıdy Egemen.kz .
Saltanatty shara barysynda Qorǵanys mınıstriniń orynbasary general-maıor Shaıh-Hasan Jazyqbaev áskerı daıarlyqta úzdik dep tanylǵan sarbazdardy quttyqtap, 2024 jylǵy kóktemde shaqyrylǵan jáne qyzmetin aıaqtaǵan 22 sarbazǵa oqý sertıfıkattaryn tabystady.
Jańa bastama – memlekettik qoldaý tetigi retinde UBT tapsyrmaı-aq joǵary oqý oryndaryna túsý múmkindigin usynady. Bul – áskerı qyzmetke yntalandyrý, jastardy qoldaý jáne olardyń kásibı damýyna jaǵdaı jasaýǵa baǵyttalǵan mańyzdy qadam.
17 500-den astam sarbaz baıqaýǵa qatysyp, irikteý qorytyndysy boıynsha úzdikter grant ıegeri atandy. Olardyń qatarynda QR Qarýly Kúshteri, Memlekettik kúzet qyzmeti, Tótenshe jaǵdaılar mınıstrligi, UQK Shekara qyzmeti jáne Ulttyq ulannyń áskerı bólimderinde qyzmet etken azamattar bar.Sarbaz 2.0 aqparattyq júıesi arqyly irikteý ádil jáne ashyq túrde ótti. Bul júıede sarbazdardyń oqý jetistikteri men tártibi týraly málimetter tirkeledi.Grant ıegerleri endi tek tegin oqýmen shektelmeı, sonymen qatar stıpendııa, tegin jataqhana jáne áskerı kafedraǵa emtıhansyz qabyldaný múmkindikterine ıe boldy.
Bólingen granttar:
• 2010 oryn – azamattyq joǵary oqý oryndaryna
• 253 oryn – Qorǵanys mınıstrliginiń áskerı ınstıtýttaryna
• 36 oryn – Ulttyq ulan akademııasyna
• 12 oryn – UQK Shekara qyzmeti akademııasyna
• 3 oryn – Tótenshe jaǵdaılar mınıstrliginiń oqý ornyna
Saltanatty rásimde sóz alǵan áskerı boryshyn áýe qorǵanys kúshteriniń 44813 áskerı bóliminde ótegen Vladıslav Vnýkovskıı:
«Qazaqstan Respýblıkasynyń Qarýly Kúshterindegi qyzmet men úshin erlik, tártip pen tózimdiliktiń mektebi ǵana emes, komandalyq jumysty meńgergen erekshe kezeń boldy. Búgin men kez kelgen qazaqstandyq JOO-ǵa oqý sertıfıkatyn alyp, ákemniń jolyn jalǵastyryp, áýe qorǵanys kúshteriniń áskerı ınstıtýtyna túsip, ofıser retinde qyzmetimdi jalǵastyrýdy sheshtim», dedi ol.
Sharaǵa sarbazdardyń ata-analary men armııanyń arqasynda joǵary oqý oryndaryna túsken stýdentter de qatysyp, óz oqıǵalarymen bólisti.
Araılym MYRZAHAN, EUÝ 2 kýrs stýdenti