Astanada Ulttyq qorǵanys ýnıversıtetiniń jedel-taktıkalyq basqarý býyny boıynsha bilim alǵan magıstrant-ofıserlerge dıplom tapsyrý saltanaty ótti. Bıyl joǵary oqý ornyn 150-den asa magıstrant sátti aıaqtady. Endi olar Qarýly kúshter men ózge de áskerler jáne áskerı qurylymdardyń komandalyq quramyn tolyqtyrady.
Ulttyq qorǵanys ýnıversıteti – elimizdiń Qarýly kúshteriniń áskerı oqý oryndarynyń bilim berý jáne ǵylymı qyzmetin úılestiretin iri vedomstvoaralyq ádistemelik ári ǵylymı ortalyq sanalady. Ýnıversıtet qurylǵaly beri 1,5 myńnan asa jedel-taktıkalyq jáne jedel-strategııalyq basqarý býynynyń áskerı mamandary daıarlanǵan.
– Túlekterdi alda áskerı bólimder men quramalardy basqarý, armııamyzdyń jaýyngerlik daıyndyǵy men kásibıligin arttyrý syndy mańyzdy mindetter kútip tur. Osy jyly bizdiń ofıserlermen qatar, Qyrǵyzstan jáne Tájikstannyń da ofıserleri bilim aldy. Bul ózara áskerı yntymaqtastyq pen baýyrlastyqty nyǵaıtýǵa sep bolady, – dedi Qorǵanys mınıstriniń birinshi orynbasary – Bas shtab bastyǵy Sultan Kamaletdınov.
Bıyl bilim ordasynan túlep ushqandar qatarynda IIM Ulttyq ulanynyń 19 ofıseri bar. Sondaı-aq quqyqtyq tártip áskeri atynan polkovnık Arman Ysqaqov doktorantýrany aıaqtap, PhD ǵylymı dárejesin aldy.
– Áskerı qyzmet jolyndaǵy taǵy bir mańyzdy beles artta qaldy. Ýnıversıtette alǵan joǵary bilimmen qatar, dostyq, qoldaý rýhyn da ózderińizben birge alyp bara jatqandaryńyzǵa senimdimin. Bul rýh jyldar óte kele nyǵaıa túsip, elderimizdiń qorǵanys qabiletin jáne beıbit damýyn qamtamasyz etýge qyzmet etedi, – dep Ulttyq ulan bas qolbasshysynyń orynbasary Baýyrjan Abjanov túlekterge tilek bildirdi.
Saltanatty is-shara sońynda Qarýly kúshter Ulttyq áskerı-patrıottyq ortalyǵy jáne Ulttyq ulannyń án-bı ansambli birlese óner kórsetti. Qurmet qaraýyly rotasynyń sarbazdary qarýmen saptyq kórinis jasap, kórermenderge áserli defıle tartý etti. Áskerı dástúr boıynsha, túlekter saltanatty marshpen sap túzep, Ulttyq ulannyń orkestri súıemeldeýimen «Atameken» patrıottyq ánin oryndady.