Senat tóraǵasy Máýlen Áshimbaev bir top depýtatpen birge OzgeEpic atty alǵashqy iri kreatıvti habyna baryp, onyń qyzmetimen tanysty. Sonyń aıasynda habtyń shyǵarmashylyq toby aýtızm jóninde tereń oı salatyn jáne sol qıyndyqty eńserý jolynda qalyptasqan standarttan tys sheshimder izdeıtin oqıǵany baıandaıtyn «Qushtar» spektaklin sahnalady.
OzgeEpic habynda biregeı etno-murajaı men qolóner sheberhanasy bar. Munda teatr qoıylymdary, mýzykalyq jáne poezııalyq keshter men kórmeler ótkizýge arnalǵan keńistik te qarastyrylǵan. Uıymdastyrýshylardyń aıtýynsha, negizgi maqsat – zamanaýı óner arqyly qazaq mádenıeti men kreatıvti ındýstrııany damytý. Sondaı-aq atalǵan bastama daryndy jastardyń áleýetin ashýdy, tájirıbeli óner qaıratkerlerimen jáne shyǵarmashyl zııaly qaýym ókilderimen birlesip, olardyń jobalaryn iske asyrýǵa qoldaý kórsetýdi kózdeıdi.
О́ner arqyly qazirgi ózekti problemalarǵa jáne qoǵamdy tolǵandyrǵan túıtkilderge basa mán berip, olardy sheshýdiń standarttan tys joldaryn usyný aıryqsha mańyzǵa ıe. Aýtıst balalar týraly qoıylym ınklıýzııa taqyrybyndaǵy osyndaı tyń tásilderdiń biri ekenin atap ótken jón. Bul – OzgeEpic haby men Senat janyndaǵy Sarapshylar klýby birlesip ázirlegen irgeli joba.
Palata spıkeri múgedektigi bar adamdar úshin teń múmkindikterdi qamtamasyz etý, olardyń ortaǵa beıimdelýine jáne kásibı turǵydan ósýine jaǵdaı jasaý, sondaı-aq osy baǵyttaǵy basqa da ózekti máselelerdi sheshý jolynda keshendi tásilderdiń mańyzy zor ekenin de tilge tıek etti.
«Prezıdent Qasym-Jomart Toqaevtyń saıası baǵdarynyń basym baǵyttarynyń biri ınklıýzıvti qoǵam qurý ekeni anyq. Keıingi jyldary múgedektigi bar adamdarǵa jáne halyqtyń áleýmettik osal toptaryna memleket tarapynan qoldaý kórsetý júıeli sıpatqa ıe boldy. Osy baǵytta tıisti zańdar da qabyldanyp jatyr. Bul máselede tek áleýmettik-ekonomıkalyq jáne ınfraqurylymdyq jobalarmen shektelýge bolmaıdy. Inklıýzıvti qoǵam qalyptastyrý úshin adamdardyń ınklıýzııaǵa degen kózqarastary men bul saladaǵy tásilderdi ózgertý jáne múgedektigi bar adamdardy júıeli qoldaý asa mańyzdy. Osy turǵydan kelgende búgin tamashalaǵan «Qushtar» spektakliniń máni zor», dep M.Áshimbaev «Creativity Support» Team kreatıvti tobynyń jumysyna joǵary baǵa berdi.
Áleýmettik baǵyttaǵy jobany tabysty iske asyrýda urpaqtar sabaqtastyǵyna da basa mán berildi. Qoıylymdy sahnalaýǵa Q.Qýanyshbaev atyndaǵy Qazaq ulttyq mýzykalyq drama teatrynyń, «Jastar» teatrynyń, Á.Mámbetov atyndaǵy memlekettik drama jáne komedııa teatrynyń, Astana qalasy mýzykalyq jas kórermen teatrynyń kásibı akterlerimen qatar shyǵarmashyl zııaly qaýym ókilderi de atsalysyp, aıtarlyqtaı qoldaý kórsetti.
Spektakldi Parlament depýtattarymen qatar óner, bilim berý salasynyń mamandary, sarapshylar jáne taǵy basqalar tamashalady.
Aıta keteıik, «Qushtar» qoıylymynyń basty maqsaty – aýtızmge jáne onyń áleýmettik aspektilerine tereń úńilý, sondaı-aq osy máselege qoǵamnyń nazaryn aýdarý. Oqıǵa jelisinde aýtızm uǵymy barlyq salany habardar etý jáne baılanys ornatý, ózara dıalog pen áleýmettik teńdikti nyǵaıtý turǵysynan qarastyrylady. Joba qazirgi zamanǵy áleýmettik máseleler men úrdisterdi eskere otyryp, ǵylymı, áleýmettik jáne mádenı zertteýlerge negizdelgen. Spektakl barysynda mańyzdy problemalar tereń taldanyp, jańa kórkemdik sheshimder men ádister usynylady.