Qazaqstannyń eńbek naryǵyn aýqymdy jańǵyrtý kútip tur. Qazirdiń ózinde zamanaýı ekonomıkanyń talaptaryna jaýap beretin segiz jańa kásip engizý josparlandy. Olardyń ishinde 3D basyp shyǵarý ınjenerleri men robotty boıaý júıeleriniń operatorlary bar, dep habarlaıdy Egemen.kz.
Jańa mamandyqtar pılottyq negizde Almaty men Qostanaıda engiziledi. Sonymen qatar jasandy ıntellekt tehnologııalaryn paıdalanýmen 60 kásibı standart ázirlenip jatyr. Olar ekonomıkanyń negizgi salalarynda, sonyń ishinde mashına jasaýda 336 kásipti qamtıdy. 2024-2026 jyldarǵa arnalǵan uzaq merzimdi josparǵa sáıkes, barlyǵy 1371 kásipti qamtıtyn 250 kásibı standart ázirlenetin bolady.
Qazir ınjenerlik-tehnıkalyq personaldyń biliktiligin arttyrý úshin sheteldik kásiporyndarda taǵylymdamadan ótýdiń ınnovasııalyq baǵdarlamasy engizilip jatyr. Onyń ereksheligi – birlesken qarjylandyrý tetigi arqyly shyǵystar respýblıkalyq bıýdjet pen kásiporyndar arasynda teń bólinedi. Iаǵnı mamandardyń ozyq halyqaralyq tájirıbeni qabyldap, óz ónerkásibimizdiń erekshelikterine tıimdi beıimdelýge kómektesetin bul tásil boıynsha shetelde oqytý aqysynyń 50%-yn memleket tólese, qalǵany kásiporyn qarajaty esebinen jabylady.
Bilikti kadrlardy daıarlaý máselelerinde hımııa ónerkásibi de basymdyqqa ıe boldy. Hımııa salasyndaǵy kadr tapshylyǵyn keshendi sheshý úshin jetekshi joǵary oqý oryndarynda – Satbayev University, QazUÝ, QazUTZÝ, sondaı-aq Taraz hımııa-tehnologııalyq kolledji sekildi beıindi oqý oryndarynda memlekettik bilim berý granttary edáýir keńeıtildi. 536 kolledjde dýaldy bilim berý baǵdarlamalary engizildi. Bul bastamalardyń túpki maqsaty – óndiristik kásiporyndarmen tyǵyz seriktestikti jolǵa qoıyp, stýdentterdiń óndiristik tájirıbeden ótýine, sodan keıin naqty jumysqa ornalasýyna jaǵdaı jasaý. Birqatar kásiporyndar ózderiniń bolashaq mamandaryn oqytýdy tolyǵymen óz moınyna alǵan. «Bolashaq» halyqaralyq baǵdarlamasy jáne sheteldik oqý oryndarymen tikeleı áriptestik óndiristi avtomattandyrýdy, hımııalyq qaýipsizdikti jáne ekologııalyq monıtorıngti qosa alǵanda, joǵary tehnologııalyq baǵyttar úshin ınjenerlik kadrlardy daıarlaýdy qamtamasyz etedi.
Sol sekildi jastar arasynda geolog mamandyǵynyń tanymaldyǵyn arttyrý da mańyzdy. Bul maqsattaǵy jumystardyń eleýli nátıjesin tıisti derekterden kóremiz: eger 2022 jyly geologııalyq mamandyq boıynsha 1224 túlek dıplom alsa, 2024 jylǵa qaraı olardyń sany 3000-nan astqan. Sátbaev tehnıkalyq ýnıversıtetiniń málimetinshe, túlekterdiń 98%-y oqyǵan mamandyǵy boıynsha jumysqa ornalasady.
Osyndaı júıeli sharalardyń jańa kásibı býyndy qalyptastyryp, el ekonomıkasyn tehnologııalyq jańǵyrtý, halyqaralyq naryqta básekege qabilettilikti arttyrý mindetterin tabysty sheshýge septigin tıgizerine senim mol.