Astanalyq ákeli-balaly IT mamandar aýyl balasyna álemdik bilimge jol ashty. Bulaı deýimizge de negiz joq emes. Sebebi Astanada oqýshy men onyń ákesi birigip, jasandy ıntellekt negizinde jumys isteıtin bilim berý platformasyn jasap shyqqan. UniMentor AI dep atalatyn bul bastama – aýyldaǵy qarapaıym oqýshynyń Garvard, Oksford syndy bedeldi ýnıversıtetterge túsýine kómektesetin zamanaýı qural. Alǵashqy bes myń qoldanýshysy bar startap jyl sońyna qaraı keń kólemde iske qosylmaq.
Otbasylyq jobadan – ulttyq ıdeıaǵa
Búginde shetelge oqýǵa túsý týraly keńes beretin mamandardyń qyzmeti qyrýar qarjyǵa túsetini belgili. Mundaı kómekti ekiniń biri ala almaıtyny jasyryn emes. Osy máseleni basynan ótkergen Erjan Qudaıbergenov pen onyń uly Jáńgirhan Baýyrjan osy salanyń qoljetimdiligin arttyrýdy maqsat etip, biregeı sheshimge keldi: barsha balaǵa qoljetimdi aqyldy keńesshi jasaý.
«Biz ulym ekeýmiz oǵan laıyq ýnıversıtet izdegende, keńesshilerdiń qyzmeti myńdaǵan dollar turatynyn kórdik. Bul qala balalary úshin de, aýyldaǵy balalar úshin tipti qııaldaǵy dúnıe ekenin túsindik. Sondyqtan bárine birdeı múmkindik beretin aqyldy kómekshi jasap shyǵýǵa bekindik», – deıdi jobanyń avtory Erjan Qudaıbergenov.
Jasandy ıntellekt kómektesedi
UniMentor AI – oqýshynyń bilimi, tili, qyzyǵýshylyǵy men qarjylyq múmkindigin eskere otyryp, oǵan laıyq sheteldik oqý oryndaryn usynatyn platforma. Júıe motıvasııalyq hattardy taldap, essedegi mazmun men logıkalyq qurylymǵa qatysty naqty usynystar beredi. Sondaı-aq, suhbat suraqtaryn modeldeıtin arnaıy bólim bar – ıaǵnı, AI oqýshyny shynaıy qabyldaý komıssııasymen sóıleskendeı synap, jaýaptarǵa keri baılanys beredi.
Joba negizinen oqýshylardyń derekterine súıengen. Ony Jáńgirhan ózi úırengen Data Science daǵdylary arqyly jasap shyqqan. GeekBrains platformasynan onlaın oqyp shyqqan jasóspirim tek tehnıkalyq modeldermen shektelmeı, shynaıy qoldanýǵa yńǵaıly júıe qura bildi.
Paıdalanýshylar arasynda – aýyl jastary da bar
Búginde UniMentor AI-dy alǵashqy 5000 oqýshy synaqtan ótkizip jatyr. Olardyń qatarynda Nazarbaev zııatkerlik mektepterimen qatar, aýyl mektepteriniń oqýshylary da bar. Iаǵnı bul joba qala men aýyl arasyndaǵy bilim teńsizdigin joıýǵa baǵyttalǵan.
Aıyna nebári $9,99–19,99 tólem arqyly oqýshylar ózine sheteldik qabyldaý keńesshisin jaldaǵandaı kómek ala alady. Al álem boıynsha mundaı qyzmetterge jylyna $2 000–8 000 jumsalatynyn eskersek, UniMentor AI – qarjylyq jaǵynan da tıimdi ári teńdesi joq balama.
Joba resmı túrde AQSh-tyń Kentýkkı shtatynda tirkelgen. Bul – halyqaralyq quqyqtyq keńistikte qaýipsiz jumys isteýdiń zamanaýı tásili. Alaıda negizgi ǵylymı-zertteý toby men tehnıkalyq iske asyrýshy komanda Astanada jumys istep jatyr. Kúzde jobanyń iOS jáne Android qosymshalary shyqpaq. Sonymen qatar, 5000-nan astam grant pen shákirtaqyny izdeýge arnalǵan Scholarship Finder modýli de daıyndalýda.
Jobanyń maqsaty – jyl sońyna deıin 15 myń belsendi qoldanýshyǵa jetý.
UniMentor AI – bul tek otbasylyq bastama emes. Bul – aýyl balasyna álemdik bilimge jol ashatyn naqty tetik. Búgingi tańda «aqyldy keńesshini» aýyldaǵy mektepterge jetkizý – bilim teńdigin qamtamasyz etýdiń zamanaýı joly. Osyndaı bastamalar arqyly Qazaqstan tehnologııalyq damý men adamı kapıtaldy ınvestısııalaýdyń jarqyn úlgisin kórsetip otyr.