Bıyl Mádenıet jáne aqparat mınıstrligi men Qazaqstan Jazýshylar odaǵy birlesip, «Jazýshylardyń ádebı sheberlik mektebi kýrsy», «Jańa Qazaqstannyń ádebı-tanymdyq panoramasy», «TMD elderiniń arhıvterindegi qazaqstandyq jazýshylardyń zertteý jumystary» atty úsh jobany júzege asyrady, dep habarlaıdy Egemen.kz.
Qazaqstan Jazýshylar odaǵynyń baspasóz qyzmeti úsh konkýrsqa da qujattar qabyldaý bastalǵanyn málimdep, barsha qalamgerlerdi jobaǵa qatysýǵa shaqyrdy. «Jazýshylardyń ádebı sheberlik mektebi» atty birinshi joba boıynsha, elimizdiń barlyq aýmaǵynda turatyn jas qalamgerler (18-35 jasqa deıin) ótinim bere alady. О́tinim berýshi Qazaqstan Jazýshylar odaǵynyń múshesi bolýy mindetti emes.
Osy joba aıasynda jas qalamgerler Qazaqstan Jazýshylar odaǵynyń janyndaǵy «Jazýshylardyń ádebı sheberlik mektebine» 10 kúndik oqýǵa kelip, tálimgerler sheteldik jáne otandyq tanymal qalamgerlerden dáris alady. Ádebı sheberlik mektebine qatysýshy jas qalamgerlerdiń joly, tamaǵy jáne jatyn orny Qazaqstan Jazýshylar odaǵy tarapynan tólenedi. Joba sońynda ár jas qalamgerge arnaıy kýrstan ótkeni týraly sertıfıkat beriledi.
Al, «Jańa Qazaqstannyń ádebı-tanymdyq panoramasy» atty ekinshi jobaǵa da elimizdiń barlyq aýmaǵynda turatyn jas qalamgerler (18-35 jasqa deıin) qatysýǵa quqyly. Bul joba boıynsha da úmitker Qazaqstan Jazýshylar odaǵynyń múshesi bolýy mindetti emes. Jas qalamgerler jazatyn týyndysyna aqparat jınaý úshin elimizdiń ár óńirin aralap, ólkeniń tarıhy, mádenıeti men búgingi tynys-tirshiligimen tanysady. Qalamgerdiń issapar shyǵyny men qalamaqysy uıymdastyrýshylar tarabynan tólenip, jazǵan týyndysy kitap bolyp jaryq kóredi.
Úshinshi jobanyń ataýy – «TMD elderiniń arhıvterindegi qazaqstandyq jazýshylardyń zertteý jumystary». Jobaǵa qatysýǵa elimizdiń barlyq aýmaǵynda turatyn jazýshylar ótinim bere alady. Jasqa shekteý qoıylmaıdy. Basty talap ótinim berýshi Qazaqstan Jazýshylar odaǵynyń múshesi bolýy mindetti.
Joba aıasynda qalamger TMD elderiniń arhıvterine baryp, elimizdiń mádenıeti men ádebıetine qatysy bar muraǵattyq materıaldardy taýyp, zertteýler júrgizedi, muraǵat materıaldary negizinde ǵylymı-tanymdyq, ǵylymı-zertteý nemese ocherk sıpatyndaǵy kitaptar nemese arhıvtik materıaldar jınaqtaryn shyǵarady.