Balanyń denesin izdeýge óńirlik tótenshe jaǵdaılar departamentiniń qyzmetkerleri jumyldyryldy. Qutqarýshylar kólde qatty tolqyn turyp, kedergi keltirip jatqanyn aıtady, dep habarlaıdy Egemen.kz.
Ekibastuz qalasyna qarasty Solnechnyı kentindegi «Shandaqsor» jasandy kólinde 4 shilde kúni saǵat 16.10 shamasynda 2009 jyly týǵan er bala sýǵa batyp ketken.
- Bala tyıym salynǵan jerde sýǵa túsken. Qazirgi ýaqytta izdeý boıynsha jumystar jalǵasýda. Izdeý is-sharalaryna Pavlodar oblysy tótenshe jaǵdaılar departamentiniń Jedel-qutqarý jasaǵynyń kúshteri - 6 qyzmetker, 2 birlik tehnıka, 2 júzý quraly, sondaı-aq eholot tartyldy. Qolaısyz aýa raıy, atap aıtqanda ekpindi jel men kól betindegi úlken tolqyndar kóp qıyndyq týdyryp tur.Soǵan qaramastan súńgýirler jumystaryn jalǵastyrýda,-dep habarlady óńirlik tótenshe jaǵdaılar departamentiniń baspasóz qyzmetinen.
Tótenshe jaǵdaı qyzmetiniń mamandary jabdyqtalmaǵan jerlerde shomylý óte qaýipti ekenin eskertedi. Sýdaǵy qaýipsizdik erejelerin saqtaý – adam ómiri men densaýlyqty saqtaýdyń kepili.