Keshe Reseı Federasııasynyń Ekaterınbýrg qalasynda «INNOPROM» XV halyqaralyq ónerkásiptik kórmesi óz jumysyn bastady. Atalǵan is-sharaǵa qatysqan qazaqstandyq delegasııany QR Premer-mınıstriniń birinshi orynbasary Roman Sklıar bastap bardy, dep habarlaıdy Egemen.kz.
Bıylǵy kórmege 17 eldiń resmı ókilderi men bıznes qaýymdastyqtarynyń ókilderi qatysty. Iskerlik baǵdarlama aıasynda 11 myńnan astam uıym men kompanııa qatysatyn 100-den astam is-sharany ótkizý josparlanǵan.
Paneldik sessııalar bastalar aldynda delegasııa basshylary Qazaqstan Respýblıkasynyń, Belarýs Respýblıkasynyń ulttyq ekspozısııalaryn, sondaı-aq kórmeniń seriktes eli – Saýd Arabııasynyń stendin aralaǵan.
Qazaqstannyń ulttyq ekspozısııasynda metallýrgııa, mashına jasaý, aýyr ónerkásip jáne halyq tutynatyn taýarlar óndirisi salalaryn qamtıtyn 12 jetekshi kásiporynnyń ónimderi men jobalary usynylǵan.
Kórme aıasynda ótken strategııalyq sessııanyń basty taqyryby – «Tehnologııalyq kóshbasshylyq: ındýstrııalyq serpilis» boldy.
Sonymen qatar sessııa barysynda Roman Sklıar Qazaqstannyń óńdeý ónerkásibindegi negizgi jetistikterine toqtalyp, salanyń bolashaq damý perspektıvalaryn tanystyrǵan. Sondaı-aq basqa eldermen óndiristik kooperasııany damytý, birlesken jobalardy júzege asyrý, ınvestısııa tartý syndy mańyzdy máselelerdi kóterdi.