Elimizdiń oqýshylary Avstralııada ótip jatqan bedeldi halyqaralyq matematıkalyq olımpıadada (IMO-2025 – International Mathematical Olympiad) joǵary nátıje kórsetip, el namysyn abyroımen qorǵady. Jalpykomandalyq esepte oqýshylarymyz 4 kúmis jáne 2 qola medal jeńip aldy, dep jazady Egemen.kz.
Kúmis júldeni Haileybury Almaty mektebiniń oqýshylary Mıron Iýrkevıch pen Amırlan Amanjolov, sondaı-aq Astana qalasyndaǵy Spectrum International School-dan Marǵulan Sharel jáne Almaty qalasyndaǵy Respýblıkalyq fızıka-matematıka mektebiniń (RFMM) oqýshysy Amır Sahıpov ıelendi.
Qola medaldar Almaty qalasyndaǵy Nurorda mektebiniń oqýshysy Erasyl Altynbek pen Aqtóbe oblysyndaǵy «Bilim-ınnovasııa» lıseı-ınternatynyń oqýshysy Erqanat Kenlıshikke buıyrdy.
Qazaqstan quramasynyń ǵylymı jetekshileri – PhD doktory Asylbek Isaxov pen halyqaralyq olımpıadalar jeńimpazy Qanat Satylhanov.
Bıylǵy IMO-2025 olımpıadasyna álemniń 112 elinen 650-ge jýyq oqýshy qatysqan. Olardyń barlyǵy kúrdeli matematıkalyq esepterdi sheshý arqyly óz eliniń bilim sapasy men ıntellektýaldyq deńgeıin kórsetti. Qazaqstandyq qatysýshylar da osyndaı joǵary básekede bilim deńgeıi men daıyndyqtarynyń myqtylyǵyn dáleldeı bildi.
Aıta keteıik, International Mathematical Olympiad álemdegi eń bedeldi mekteparalyq ǵylymı jarystardyń biri.