Áskerı qyzmetten – stýdent aýdıtorııasyna

Solardyń biri – zapas­qa shyqqan qatardaǵy jaýynger Janbolat Espen. Ol áskerge deıin Shymkent qalasyndaǵy jergilikti áskerı basqarý organdarynyń birinde ınspektor bolyp jumys istegen. Merzimdi áskerı qyzmetti sátti ótep, jaǵymdy minezdeme alǵan sarbazdar UBT tapsyryp, ball jınamaı-aq ýnıversıtetke túse alady. Osyny estigen Janbolat múmkindikti qalt jibergisi kel­meıdi. Sóıtip, memlekettik grant ıesi bolýdy ózine maqsat etip qoıady.

Qaraǵandy garnızonyn­da­ǵy áskerı bólimderdiń birin­de qyzmet etken Janbolat ózine júktelgen mindetterdi adal oryndap, jaýyngerlik jáne memlekettik-quqyqtyq daıyn­dyq baǵdarlamasyn joǵary deńgeıde meńgerdi. Qyzmet barysynda birneshe ret Astana qalasyna issaparǵa baryp kel­di. Onyń tabandylyǵy men jaýap­kershiligi bólim basshylyǵy tarapynan joǵary baǵalan­­dy. 12 aılyq áskerı qyzmetin ­aby­roımen aıaqtaǵannan keıin «Kóktem – 2024» shaqyry­ly­mynyń úz­dik sarbazdar qata­ry­na kirgen Janbolat Espen mem­le­kettik grant ıegeri atandy. Bul qýa­nyshty jańalyqty aldymen anasy Gúljaýhar Sársembaeva estıdi. Ulynyń bul jetistigi ana júregin erekshe tolqytqan. Balasyn quttyqtap, analyq aq tilegin arnady.

Qazir Janbolat týǵan qalasy Shymkentke oralyp, «Mıras» ýnıversıtetine qujatyn tapsyryp, oqýyn bastaýǵa daıyndalyp júr. Áskerden zapasqa shyqqan ol Abaı, Ál-Farabı, Turan aýdandary boıynsha biriktirilgen qorǵanys isteri basqarmasyna baryp, áskerı qyzmet arqyly memlekettik grantqa qalaı qol jetkizýge bolatynyn aıtty.

«О́r rýhty babalardyń jolyn jalǵaý – búgingi urpaqtyń paryzy. Elin, jerin jaý­dan qorǵaý – árbir er-azamattyń min­deti. Sol jaýapkershilikti jete túsingendikten óz erkimmen ásker qataryna alynyp, abyroımen ótkerip keldim. Táýelsizdiktiń tiregi – onyń áskerı qorǵanysy. Búginde memleket qorǵanys salasyn kúsheıtýge barynsha kóńil bólip jatyr. Sonyń ishinde qatardaǵy jaýyngerlerge de erekshe qamqorlyq pen jaǵdaı jasalǵan. Muny naǵyz áskerı ómirdi kózben kórip kelgen sarbaz retinde tolyq senimmen aıta alamyn. Men áskerde júrgende jaýyngerlik tártippen birge qarýdan oq atýdy, áskerı tehnıkalar men olardyń paıdalaný maqsattaryn, sondaı-aq maıdan dalasynda urys júrgizýdiń ádis-tásilderin úırendim. О́zimdi, elimdi jaýdan qorǵaıtyn daıyn jaýyngermin dep esepteımin. Kez kelgen sátte qolyma qarý alyp, Otanymdy jaýdan qor­ǵaýǵa ázirmin. Meniń oıymsha, barlyq er-azamat Otany úshin qurban bolýǵa daıyn bolýy kerek. Joǵaryda aıtqanymdaı, ásker­de sarbazdarǵa barlyq jaǵdaı jasalǵan. Boryshymdy óteý barysynda eshqandaı qıyndyq kórgen joqpyn. Kerisinshe, áskerı ómir maǵan óte qyzyqty ótti. Sol jerden talaı syrlas dos taptym. Áskerı qyzmet meniń ómirimniń jańa bir belesi boldy. Jaýyngerlik mindetim­di atqara júrip, osy salada talaı tájirıbe jınaqtadym. «Qoıandy qamys, jigitti namys­ óltiredi» demekshi, áskerge barý­­­dan qorqýdyń qajeti joq. Sar­bazdyń áskerde qalaı jú­re­tini ózin kópshilik ortada qalaı ustaıtynyna, minezi men tárbıesine baılanysty. Adal, ótirik sóılemeıtin, kishini syılap, úlkendi qurmetteı bile­tin, jaqsy men jamandy ajyrata alatyn adam qaı ortada júrse de, óz abyroıyn jo­ǵalt­­paıdy. Onyń ústine, qazir jaýyngerlik mindettiń merzimi bir-aq jyl. Bir jyl degen ýaqyt kózdi ashyp-jumǵansha ótedi de ketedi. Er jigitterdiń minezin qalyptastyratyn, naǵyz erlershe shyńdaıtyn jer – osy áskerı orta», dedi kezdesýde aǵynan jarylǵan J.Espen.

Atalǵan basqarma bas­ty­ǵy­nyń orynbasary, maıor Erdáýlet Temirbaev Janbolat­tyń jetistigi áskerdiń erlik mektebi ǵana emes, jarqyn bola­shaqqa bastaıtyn jol deıdi.

«Ár adam ómirde óz jolyn tapqysy keledi. Jaqsy maman ataný, sonyń jemisin kórý – ómirde sol jolyńdy tap­qan­dyqtyń belgisi. Sondyq­tan kez kelgen jan bala kezi­nen óziniń súıip tańdaǵan maman­dyǵy­nyń ıesi bolǵandy armandaıdy. Sol sebepti, kópshilik er-aza­mat­tar mektep bitirgen soń, tezirek joǵary oqý ornyna túsýge um­tylady. Oqýǵa túse almaı qal­sa, ýaqytyn tekke ketirgen­deı eles­tetedi. Er jigitterdiń ás­ker­ge barýǵa asyqpaýynyń bir se­­bebi osy bolsa kerek. Múmkin­digi barda qolyna dıplom alyp úl­gergendi jón kóredi. О́ıt­keni ýaqyt ótken saıyn adam tirshilikpen aldanyp, oqýǵa de­gen baıaǵy qyzyǵýshylyq pen belsendiligi azaıyp qalýy múmkin. «Temirdi qyzǵan kezde soq» demekshi, mektep bitirip jalyndap turǵan shaqta bilim joly­nyń yrǵaǵyn buzbaı, joǵary oqý ornyna túsip ketkendi qalaıdy. Mine, qoǵamnyń osy máselesin eskergen memleket sarbaz­dar qataryna alynyp, áskerı boryshyn ótep kelgen jas jaýyn­gerlerdiń stýdent atanýyna úlken jeńildik jasap jatyr. Memlekettiń bul bas­tamasy – naǵyz qamqorlyqtyń úlgisi. Kóp jaǵdaıda sarbazdar ásker­den oralǵan boı­da jumysqa aralasyp ketedi. Jo­ǵary bilim alýǵa qulshynys azaıady, oǵan qosa aqyly negizde oqy­týǵa otbasylyq bıýdjet­tiń jet­peýi múmkin. Bul rette memle­kettiń jas jaýyngerlerge arnaıy jeńildik jasap, tegin grant qarastyryp berýi – úlken áleý­mettik qoldaý», dedi E.Temirbaev.