Astanada ústel tennısin damytýǵa baǵyttalǵan jańa klýb ashylyp, balalar men jasóspirimderge arnalǵan seksııalardan bastap, eresekterge arnalǵan toptarǵa deıin júıeli jumys isteı bastady.
Zamanaýı talapqa saı jabdyqtalǵan sport klýbynyń negizin qalaýshy –jýrnalıst Aıbek Qosan. Onyń aıtýynsha, joba eń aldymen jeke qyzyǵýshylyq pen salamatty ómir saltyn qalyptastyrýǵa degen umtylystan bastaý alǵan.
– Ústel tennısinen úıirme ashýdy birden bıznes retinde qarastyrǵan joqpyn. Kerisinshe, kúndelikti aınalysyp júrgen paıdaly isti nege ózim uıymdastyryp, basqalarmen bólispeske degen oı týdy. Aptasyna eki ret dostarymmen fýtbol nemese tennıs oınaý – ómir saltymyzǵa aınalǵan daǵdy. Keıin osy isti keńeıtip, jurtshylyqqa paıdaly orta qalyptastyrýdy maqsat tuttym, – deıdi klýb ıesi.
Jańa ortalyq tek sportpen shuǵyldanatyn oryn ǵana emes, sonymen qatar ujymdyq kezdesýlerge, bos ýaqytty tıimdi ótkizýge arnalǵan keńistikke aınalǵan. Ásirese ata-analar men balalar birge kelip, otbasylyq qarym-qatynasty nyǵaıtatyn orta qalyptasyp otyr.
Aıbek Qosannyń pikirinshe, ústel tennısi – tek dene qımylyna ǵana emes, adam densaýlyǵyna, ásirese kóz bulshyq etterine, zeıin men jyldamdyqqa oń áser etetin tıimdi sport túri.
– Dárigerler ústel tennısin kózge arnalǵan tabıǵı jattyǵý dep ataıdy. Sebebi oıyn kezinde kózdiń kórý qabileti artady, bulshyq etter jattyǵyp, dáldik pen zeıin kúsheıedi. Ásirese kompıýter aldynda uzaq otyratyndar úshin bul – ári sergitkish, ári paıdaly áreket, – deıdi ol.
Klýb ujymy elimizde jarııalanǵan «Jumysshy mamandyqtar jyly» aıasynda birqatar týrnır ótkizýdi josparlap otyr. Mundaı bastamalar ujymdyq yntymaqtastyqty arttyryp, áriptester arasyndaǵy qarym-qatynasty nyǵaıtýǵa, seriktestik mádenıetin qalyptastyrýǵa baǵyttalǵan.
– Ujymdyq basqosýlar negizinen beıresmı, meıramhana formatynda ótip jatady. Endi osy úrdiske jańasha kózqaras usynyp, paıdaly ári densaýlyqqa tıimdi basqosý formattaryn engizgimiz keledi. Qazir qoǵamda salamatty ómir saltyna betburys bar. Buryn mundaı ómir saltyn tek sheteldik úlgi retinde kóretinbiz. Endi otbasylar balalaryn túrli sport úıirmelerine – júzý, fýtbol, voleıbol, tennıs sekildi seksııalarǵa belsendi túrde bere bastady. Bul – qýanarlyq úrdis, – deıdi A.Qosan.
Onyń aıtýynsha, búginde jastar arasynda ústel tennısine degen qyzyǵýshylyq artyp keledi. Bul sport túrimen áýesqoılyq deńgeıde de, júıeli túrde de aınalysatyndar kóbeıýde.
– Ústel tennısin buqaralyq sportqa aınaldyrý úshin ony mektep baǵdarlamasyna engizse, artyq bolmas edi. Qosymsha úıirme retinde nemese dene shynyqtyrý pániniń bir baǵyty retinde oqýshylarǵa qoljetimdi etsek, deni saý urpaq tárbıeleýge qosylǵan úles bolar edi. Sebebi bul – halyqaralyq deńgeıde moıyndalǵan, kásibı sport túri, – deıdi klýb ıesi.
Kámıla TAITО́LEÝ,
L.N.Gýmılev atyndaǵy EUÝ-dyń 3-kýrs stýdenti