Qasıetti perzenttiń dúnıege kelýin eń áýeli rýhanı álemniń elshileri jetkizedi. О́mirge enetin balanyń tegin adam bolmaıtynyn ılham-ısharamen uqtyrady. Sondaı oqıǵa Qunanbaı shańyraǵynda da bolǵan.
El ishindegi Eshen áýlıe Túrkistandaǵy Áziret Sultan kesenesine zııarat etip, Qoja Ahmet Iаsaýıdiń ákesi Ibrahım atanyń basyna túnegen-di. Sol jerde jatyp tús kóredi. Qaıtqan soń túsin Qunanbaı bıge aıtyp beredi: «Jıdebaıda aspandy tiregen ǵajap zańǵar shyń ornapty, joǵaryda Qunanbaı, odan tómen Uljan ekeýińizdi kórdim. Siz túregep tursyz, al otyrǵan Uljannyń etegi shyńnan asyp, Shyńǵystaýdy orap alǵan. Shyńnyń ushar basyna qarap edim, sizdiń artyńyzdan basy asqan bir jigitti ańdadym», dep aıtady. Sonda Qunanbaı: «Endigi perzentimniń atyn Ibrahım qoıamyn», deıdi de, Eshen áýlıege úsh qulyndy bıe, bir at bergen eken.