Prezıdenttiń Baspasóz hatshysy Rýslan Jeldibaı BAQ-tyń suraýyna oraı Qasym-Jomart Toqaev pen Vladımır Pýtınniń telefon arqyly sóılesýine qatysty pikir bildirdi.
Memleket basshysy Qasym-Jomart Toqaev pen Prezıdent Vladımır Pýtınniń telefon arqyly sóılesýine Reseı tarapy bastamashy boldy. Áńgime dostyq ári ózara senim sıpatynda órbidi.
Taraptar Ýkraına qaqtyǵysyn retteýge erekshe nazar aýdardy. Vladımır Pýtın AQSh Prezıdenti Donald Tramptyń arnaýly ókilimen kelissózder nátıjesi týraly egjeı-tegjeıli málimet berdi.
Qasym-Jomart Toqaev aldyn ala qol jetkizilgen ýaǵdalastyqtardy quptap, Qazaqstan áýel bastan áskerı qımyldardy toqtatýdy kózdeıtin beıbitshilik formýlasyn izdeýdi jaqtaǵanyn atap ótti.
Sonymen qatar memleketter basshylary ekijaqty kún tártibin talqylady.
Qazaqstan Prezıdenti bıyl qarasha aıyna josparlanǵan Máskeýge memlekettik saparyna aıryqsha mán beretinin aıtty. Atalǵan sapardyń maqsaty – strategııalyq seriktestik pen odaqtastyq rýhyndaǵy yntymaqtastyqty jan-jaqty keńeıtý.