Búgin Astana qalasyndaǵy «Nurly jol» vokzalynda el shekarasynyń shegendelgenine 33 jyl tolýyna oraı fotokórme ótti. Babadan qalǵan baıtaq dalany kirpik qaqpaı kúzetetin qyraǵy qyzmettiń san qyry taspalanǵan sýretterdi aǵa leıtenant Ashat Sábıev túsirgen. Ol 15 jyldyq eńbek jolynda qarý men fotoapparatty qatar ustaǵan, dep jazady Egemen.kz.
Qazaqstan shekarasy álemdegi eń uzyn qurlyq shekaralarynyń biri. Al Qazaqstan men Reseı shekarasy álemdegi eń uzyn úzdiksiz qurlyq shekarasy bolyp sanalady. Osyndaı ulan-ǵaıyr alqapty qorǵaý shekarashylarǵa júktelgen negizgi mindet. Taý men tas, ózen, kólik, jazyq, qumda qalǵymaıtyn shekarashylardyń qyzmeti fotokórmede aıqyn kórsetilgen. A. Sábıev osyndaı jaýapty mindetti eńsere júrip, qolynan fotoapparatyn tastamaǵan. Búgin ol jyldar boıy obektıvine iliktirgen tańdaýly 33 sýretin kórermen nazaryna usyndy.
«Meniń maqsatym Otan shebin qorǵap júrgen shekarashylardyń eńbegin nanymdy nasıhattaý. Al búgingi kórmege shekara qyzmetiniń qalyptasý tarıhyn kezeń-kezeńimen únsiz-aq túsindiretin týyndylardy qoıdyq. Kúndelikti qyzmetti, aqyl-oı kúshin jáne zastavalardan tys jerde sırek kezdesetin adaldyqty kórsetýge kóńil qoıamyn», deıdi Ashat Sábıev.
Jankeshti jumys barysyn beıneleıtin ekspozııalardyń avtoryna foto ónerdiń qyr-syryn ustazdary Tamara Dáýletpaeva men Radık Kagenov úıretipti. Otan qorǵaý syndy abyroıly qyzmette qosysha súıikti isin qabystyra alǵan aǵa leıtenant baǵyt bergen ustazdaryna, shyǵarmashylyq proseske qurmetpen qaraıtyn áriptesterine rızashylyǵyn bildirdi.
Fotokórmeni ardager shekarashylar, 16 mekteptiń «Jas shekarashylar» áskerı patrıottyq klýby, qala turǵyndary men qonaqtary tamashalady.