Armandar oryndalady
Ulystyń uly kúni, túrki halyqtarynyń tól merekesi, jyldyń jańarǵan Naýryz meıramy qarsańynda elimiz turǵyndaryna baspanaly bolyp, jańa páterge qonystaný baqyty buıyrdy. Araǵa birneshe jyldar salyp, tózimmen kútken úı kezegi jetken almatylyqtar búgingi kúnniń qýanyshyn kele jatqan uly merekeniń sharapatyna balady. Bir-birimen «súıinshilep», shashý shasha páter esigin ashqan jas otbasylar máre-sáre kúı keshti. Elimizdiń bes birdeı qalasynda oryn alyp jatqan osyndaı qýanyshty sáttiń kýágeri bolǵandar Elbasynyń «Nurly Jol» baǵdarlamasyna alǵystaryn jaýdyrdy. Memleket basshysy Nursultan Nazarbaevtyń udaıy aıtyp otyratyn baspana jónindegi bastamalary, «Nurly Jol – bolashaqqa bastar jol» Joldaýyndaǵy qoljetimdi turǵyn úı qurylysynyń mehanızmderin ózgertý ıdeıasy boıynsha júzege asyp jatqan páter máselesi jyl sanap sheshimin taýyp keledi. Endeshe, Astanadan bastaý alǵan jappaı kilt tapsyrý rásiminde Almaty qalasy boıynsha jalpy alǵanda 803 úı berilgendigi sonyń dáleli. «Báıterek» holdıngi men «Qazaqstannyń ıpotekalyq kompanııasynyń» birlesip, áleýmettik jalǵa beriletin turǵyn úı baǵdarlamasy barysynda atqaryp jatqan ıgi is-sharalary kópshilik kóńilinen shyqqandaı. Almaty qalasy boıynsha Túrkisib aýdanyndaǵy turǵyn úı kesheninde 95 páter, sondaı-aq, Qarasaı aýdanyndaǵy «Asyl arman» turǵyn úı kesheninde 708 páterdiń kilti ıelerine tabys etildi. Elmıra MÁTIBAEVA, «Egemen Qazaqstan». ALMATY.Jan jadyratqan «Jansaıa»
Shapaǵaty mol Naýryz merekesi qarsańynda Aqmola oblysynyń ákimi S.Kýlagın men «Qazaqstannyń ıpotekalyq kompanııasy» AQ basqarýshy dırektory A.Aqchýrınniń qatysýymen áleýmettik turǵyn úıdi jalǵa berý baǵdarlamasy aıasynda salynǵan «Jansaıa» turǵyn úı kesheninde jańa páterlerdiń kiltterin tapsyrý saltanaty ótkizildi. «Báıterek» ulttyq basqarýshy holdıngi» AQ departament basshysy Qanat Ybyraev qýanysh ıelerin quttyqtaý sózinde Prezıdent Nursultan Nazarbaevtyń Qazaqstan halqyna arnaǵan «Nurly Jol – bolashaqqa bastar jol» Joldaýynda áleýmettik turǵyn úılerdi jalǵa berý qurylysyna kózqarasty ózgertý, onyń qoljetimdiligi men ashyqtyǵyn qamtamasyz etý, turǵyndarǵa satyp alý quqyǵyn bere otyryp, uzaq merzimdi tómengi paıyzdyq júıeni engizýdi tapsyrǵanyn atap kórsetti. О́ńirlerdi damytýdyń 2020 jylǵa deıingi baǵdarlamasynyń sharapaty retinde búgin ásem turǵyn úı kesheninde 19,5 myń sharshy metrlik 337 páterdiń kilti tapsyrylady. Kókshetaý tarıhynda bir mezette 337 otbasynyń qonys qýanyshy bolyp kórmegen. Biz №264 páterdiń kiltin ıelengen Kákimbekovterdiń otaýyna qutty bolsyn aıttyq. Álibek pen Jansaıa eki bala ósirip otyrǵan jas otbasy. «Biz osy kúnge deıin 8 jyl boıy páter jaldap turdyq, deıdi Jansaıa. О́zim medısına qyzmetkerimin. Kúıeýim memlekettik kiris departamentinde jumys isteıdi. Memleketimizdiń qoǵam múshelerine jasap jatqan qamqorlyǵyna rızamyz. Balalarymnyń da qýanyshynda shek joq». Baqbergen AMALBEK, «Egemen Qazaqstan». Aqmola oblysy.Baqyt qushaǵynda
Sara Tasylbekova jalǵyz ózi úsh bala ósirip otyr. Baspananyń qıyndyǵyn tartýdaı tartty. Páterden páterge kóship, jataqhananyń bir bólmesine tyǵylǵan ol 2003 jyly páter kezegine turǵan bolatyn. Mine, endi otbasynyń qýanyshynda shek joq. Jaryq ta keń eki bólmeli páterdiń kiltin oblys ákimi Nuraly Sádýaqasovtyń qolynan alyp turyp, armany oryndalǵandaı boldy. Rasynda, «Arman» turǵyn úı kesheninen páter kiltin alǵan otbasylardyń barlyǵynyń da armandap jetken baspanasy edi. Elbasynyń «Nurly Jol – bolashaqqa bastar jol» Joldaýynda aıtqan tapsyrmasyna sáıkes, áleýmettik jalǵa beriletin turǵyn úı baǵdarlamasy boıynsha Qostanaı qalasyndaǵy jańa turǵyn aýdannan on bir otbasyna páter kilti tapsyryldy. Oblys ákimi kiltti tapsyryp turyp, qonys toı ıelerin quttyqtady. – Naýryz meıramy – Ulystyń uly kúni qarsańynda qostanaılyqtar páterge kirip, úlken qýanyshqa ıe bolyp otyr.Turǵyn úı qurylysy jyl saıyn qaryshtap damyp keledi. Qostanaıda 250 myń sharshy metr úı salyndy, sonyń 45 myń sharshy metri memlekettik turǵyn úı baǵdarlamasy boıynsha júzege asty. «Báıterek» holdıngi men «Qazaqstan ıpotekalyq kompanııasy» aksıonerlik qoǵamyna qostanaılyqtardyń alǵysy sheksiz. Ýaqyttyń kúrdeliligine qaramaı, oblysta turǵyn úı qurylysy ekpin ala beretin bolady. «Arman» turǵyn úı kesheninde 11 otbasyna 749 sharshy metr bólindi. Bir sharshy metrdiń quny 862 teńgeni quraıdy. Eki bólmeli páterdiń ortasha kólemi 65 sharshy metr bolady. – Qazaqstandaǵy ár otbasyna osyndaı qýanysh tileımiz. Bizdiń armanymyz oryndalady, – deıdi Saýjanovtar otbasy. «Arman» jańa turǵyn aýdanynda Naýryz meıramynyń saltanaty qonys toıymen molyǵa tústi. Názıra JÁRIMBETOVA, «Egemen Qazaqstan». QOSTANAI.Qonys toıyn toılady
Keshe Semeı qalasynda Elbasy Nursultan Nazarbaevtyń «Nurly Jol –bolashaqqa bastar jol» Joldaýyndaǵy tapsyrmasyna oraı kóppáterli jańa turǵyn úıdiń kiltin tabystaý rásimi ótti. Qaladaǵy bıýdjettik mekeme qyzmetkerleri, ata-ana qorǵaýynsyz qalǵan jetim balalar, múgedek balalary bar otbasylar, áskerı otbasylar jańa páterlerge ıe boldy. Semeıdegi Shýgaev kóshesi, 159 mekenjaıynda boı kótergen záýlim úıde 120 páter bar, barlyǵy 5,2 myń sharshy metr. Bir sharshy metr 756 teńge, ár páterdiń aýdany 45 sharshy metr. Naýryz merekesinde turǵyndardy qonystandyrýǵa arnalǵan merekelik sharada merdiger mekeme «Gordorstroı» JShS, «Semmelıorasııa» zańdy tulǵalar birlestiginiń quryltaıshysy Baýyrjan Qaırambaev sóz sóılep, jınalǵan qaýymǵa jańa salynǵan úıdiń sapasy joǵary ekendigin aıtty. Qala turǵyndaryna kiltterdi ákim Aıbek Kárimov pen «Qazaqstan ıpotekalyq kompanııasy» AQ basqarýshy dırektory Erkin Syzdyqov tabystady. – Bul biz úshin asa mańyzdy. Semeılikter úshin osyndaı barlyq jaǵdaıy jasalǵan jaıly úıge Ulystyń uly kúni Naýryzda ıe bolý jaqsylyqtyń belgisi, – dedi qonys toıyn toılaýshylardyń atynan sóz sóılegen «Aýdanaralyq onkologııalyq dıspanser» mekemesiniń qyzmetkeri Shárbat Sársembına. Raýshan Nuǵmanbekova, jýrnalıst. SEMEI.