Qurylys kelesi jyldyń jazynda bitedi

Keshe Qazaqstan Prezıdenti janyndaǵy Ortalyq kommýnıkasııalar qyzmetinde Halyqaralyq kórmeler bıýrosynyń Bas hatshysy Vısente Lossertalestiń elimizge kelgen eki kúndik resmı sapary aıasynda baspasóz májilisi bolyp ótti. Oǵan Syrtqy ister mınıstriniń birinshi orynbasary – EKSPO-2017 halyqaralyq mamandandyrylǵan kórmesiniń komıssary Rápil Joshybaev jáne «Astana EKSPO-2017» UQ» AQ-tyń basqarma tóraǵasy Talǵat Ermegııaev qatysty. Halyqaralyq kórmeler bıý­ro­synyń Bas hatshysy sa­parynyń alǵashqy kúni elordada qyzý qarqynmen júrgizilip jatqan kórme qalashyǵynyń qurylys jumystarymen tanysty. Sonymen birge, kórme uıymdastyrýdaǵy keshendi sharalarmen, pavılondardyń dızaınymen, kórme qalashyǵynyń qurylysyna ınvestorlar tartý, zańgerlik máselelerimen aı­nalysty. «Men tańerteń kór­me qalashyǵynyń qurylys alańyna baryp, jumys barysymen tanys­tym. Úlken qu­rylys alańyndaǵy tártip pen jınaqylyq meni erekshe tańǵaldyrdy. Qurylys jos­pary naqty jáne aýqymdy jasalǵan. Jospar EKSPO-ny uıymdastyrý boıynsha ótkiziletin is-sharalarǵa tolyq sáıkes keledi», dedi óz sózinde V.Lossertales. Sonymen birge, ol qurylys jumystarynyń belgilengen merzimnen bu­ryn aıaqtalatyndyǵyna se­nim bildirip, Qazaqstan ta­ra­pynyń halyqaralyq ma­man­dandyrylǵan kórmeni ót­kiz­ýge barynsha jaýapty daıyndyqpen kelip otyrǵandyǵyn atap kórsetti. «Men qazaqstandyqtardyń jahandyq sharany ótkizýde úlken jaýapkershilik bıiginen kórinetinine senimdimin», dedi ol sóziniń qorytyndysynda. Ortalyq kommýnıkasııalar qyzmetindegi júzdesýde sóı­legen sózinde «Astana EKSPO-2017» UQ» AQ bas­qar­ma tóraǵasy Ermegııaev «Biz kestege sáıkes jumys jasap qana qoımaı, kóp rette odan oza qımyldap jatyrmyz. Osy qysta qurylysshylar nysandardyń irgetasyn quıyp bitirdi. Keıbir pavılondardyń metall qurylymdary ornatylyp, keıbireýleri qazirdiń ózinde shynymen qaptaldy. Ekpindi qurylys alańyndaǵy 3500 qurylysshy ózderine júktelgen tapsyrmany mer­ziminen buryn aıaqtaýǵa jiger­lengen. Biz 2016 jyldyń so­ńyna qaraı qurylysty tolyq aıaqtaýdy josparlaǵan edik. Endi búgin ony tamyz aıynyń sońyna taman nemese qyrkúıek aıynyń basynda aıaqtaý jóninde mindet alyp otyrmyz», –  dedi. Sodan keıin júzdesýge qa­ty­sýshylar BAQ ókilderiniń kóptegen suraqtaryna jan-jaqty jaýap berdi. Osy pi­kir­alysý barysynda anyq­talǵanyndaı, búgingi kúnge deıin Astanada ótetin kórmege qatysý úshin 19 memleket óti­nish bildirgen kórinedi. Jyl aıaǵyna deıin olardyń sany 60-qa jetpek. Qazir qurylys alańynda 3500 qurylysshy eńbek etýde. Olardyń 70 paı­yzǵa jýyǵy jergilikti tur­ǵyn­dar. Jyl aıaǵyna deıin kórme qalashyǵynyń qurylys alańyndaǵy qurylysshylardyń sany 10 myń adamǵa deıin jetedi. Jylqybaı JAǴYPARULY, «Egemen Qazaqstan».