Elordada aýqymdy «Taza Qazaqstan» bastamasy aıasynda jáne Sport kúnine oraı «Táni saýdyń – jany saý» atty ekologııalyq aksııa uıymdastyryldy, dep habarlaıdy Astana qalasy ákimdiginiń resmı saıty.
Ekologııalyq is-sharany Respublica partııasy qala ákimdigimen jáne «Jasyl el» qozǵalysymen birlese ótkizdi.
Is-shara barysynda partııa músheleri, Respublica Jastary jastar qanaty men ReWomen qaýymdastyǵynyń ókilderi orman beldeýinde belgilengen marshrýt boıynsha júgirip ótip, qoqys jınady.
«Biz úshin ekologııany saqtaý jaıly aıtý ǵana emes, oǵan degen uqypty kózqarasty ózimiz úlgi etý mańyzdy. Ploggıng – bul sport pen qoqys jınaýdy ushtastyratyn ekologııalyq qozǵalys. Ol arqyly sport, komandalyq rýh jáne bolashaqqa qamqorlyq birigedi. Dál osylaı biz elimizdi jaqsy jaqqa ózgertkimiz keledi», – dedi Respublica partııasy Ortalyq apparatynyń basshysy Janat Iskakov.
Uıymdastyrýshylardyń aıtýynsha, ploggıng «Taza Qazaqstan» aksııasynyń maqsattaryna qol jetkizýge jáne ekologııalyq jaýapkershiligi joǵary qoǵam qalyptastyrýǵa eleýli úles qospaq.