Qostanaı oblysynyń Nıkolaevka aýylynda jyldar boıy aýyzsý máselesi sheshilmeı keledi. Endi eldi mekende ortalyqtandyrylǵan sý júıesi iske qosylyp, aýyl turǵyndary taza aýyzsýmen qamtylady. «Amanat» partııasynyń bastamasymen júzege asyrylyp jatqan joba qurylysy osy jyldyń qarasha aıynda aıaqtalady. Mundaǵy jumys barysymen Májilis tóraǵasynyń orynbasary Albert Raý men depýtat Erkin Ábil tanysty.
Búginde quny 1,3 mlrd teńgeni quraıtyn nysannyń 50 paıyzy daıyn. 11 shaqyrym jerge sý qubyry tartylyp, qudyqtar ornatylyp, sorǵy stansalary quryldy. Sondaı-aq dánekerleý jáne elektr-tehnıkalyq jumystar aıaqtaldy. Joba Beıimbet Maılın aýdanynyń barlyq halqyn aýyzsýmen qamtýǵa múmkindik beredi.
– Buǵan deıin elimizde shamamen 700 aýylda aýyzsý múlde bolmaǵan. Búginde partııamyzdyń tabandy ustanymynyń arqasynda bul baǵytta aıtarlyqtaı nátıjege qol jetkizdik. Erekshe atap óterligi, memlekettik qordan qosymsha qarajat tartyldy. Buǵan deıin jemqorlardan tárkilengen qarjy tek mektep qurylysyna jumsalsa, biz ony halyqtyń kúndelikti turmysymen tikeleı baılanysty jobalarǵa da baǵyttaý qajettigin kóterdik. Sonyń nátıjesinde elimizdiń júzdegen aýylynda sý qubyryn júrgizý múmkindigi týdy. Aldymyzda áli de úlken mindetter bar. Jańa sport zaldarynyń, mádenıet úıleriniń, ózge de áleýmettik nysandardyń salynýyna atsalysý qajet. Biz ákimdikter jáne máslıhattarmen birlese ár teńgeniń maqsatty jumsalýyn qatań baqylaýda ustaımyz, – dedi Májilis tóraǵasynyń orynbasary Albert Raý.
Al Túrkistan oblysynyń Saýran aýdanyna qarasty Orańǵaı aýylynda psıhonevrologııalyq aýrýlary bar balalarǵa arnalǵan 50 oryndyq ońaltý ortalyǵynyń qurylysy aıaqtalýǵa jaqyn. Osyǵan oraı Májilis depýtaty, «Amanat» partııasy fraksııasynyń múshesi Erlan Ábdıev nysannyń qurylys jumystaryn kórip qaıtty.
Partııanyń saılaýaldy baǵdarlamasy aıasynda boı kóterip jatqan ortalyqtyń jalpy aýmaǵy 9 myń sharshy metrdi quraıdy. Onda turǵyn bólmeler, jeke jáne toptyq ońaltý sabaqtaryna arnalǵan kabınetter, emdik dene shynyqtyrý zaly, psıholog, psıhıatr, nevrolog, logoped kabınetteri, fızıoterapııa blogi jáne ashana qarastyrylǵan. Sonymen qatar munda 3 pen 18 jas aralyǵyndaǵy tirek-qımyl apparaty buzylǵan 50 balaǵa qyzmet kórsetilip, jartylaı stasıonarda kúndizgi bólimge osy aýmaqqa jaqyn aýdandardan 30 bala qabyldanady. Joba quny 3,2 mlrd teńge.
Munda ıppoterapııa ádisimen emdeýde Ońtústik Koreıadan mehanıkalyq at jabdyǵy alynǵan. Elektrondy jabdyq ár eki mınýt saıyn túrli jattyǵý formalaryna enedi. Jalpy, ıppoterapııanyń 10 túrli ádisi qoldanylady. Ońaltý ortalyǵy Konstıtýsııanyń 30 jyldyǵy qarsańynda ashylady dep josparlanǵan.
– «Kedergisiz orta» týraly aıtqanda, bul abstraktili uǵym emes, adamdardyń ómirin dál qazir ózgertetin naqty sheshim ekenin túsinýimiz qajet. Orańǵaıdaǵy ońaltý ortalyǵy – erekshe kútimdi qajet etetin balalardyń ata-analary úshin perzentiniń kásibı kómek alyp, tolyqqandy ómirge qadam basýyna degen senim. Eresekter úshin – qoǵamnan shet qalmaı, belsendi ómir súrýine múmkindik beretin qoldaý, – dedi E.Ábdıev.
Depýtattardyń óńirlerge issapary barysynda Aqmola oblysy Egindikól aýdanynyń turǵyndary aýyzsý, joldyń nasharlyǵy, eldi mekendegi toraptardyń sýastynda qalýyna shaǵymdandy. О́z kezeginde Májilis depýtaty, «Amanat» partııasy fraksııasynyń múshesi Iýlııa Kýchınskaıa sýǵa qatysty jobalardyń iske asyrylýyna baqylaýdy kúsheıtýge ýáde berip, keıin Nura toptyq sý qubyryn jańǵyrtýǵa arnalǵan keńes ótkizdi.
– Sapaly aýyzsýǵa qol jetkizý – ár azamattyń zańdy quqyǵy, bul artyqshylyq emes, ómirlik qajettilik. Egindikól aýdanynda kóp jyldan beri qordalanǵan másele partııamyz ben memlekettik organdardyń júıeli jumysynyń arqasynda sheshimin taýyp keledi, – dedi depýtat.
Jalpy, Nura toptyq sý qubyry oblystyń úsh aýdanyn aýyzsýmen qamtyp otyr. Oǵan 2023 jyly aýqymdy jumys júrgizilip, Sabyndy aýylynan Egindikólge deıingi 68,5 shaqyrymdyq bóligi qaıta qalpyna keltirildi.
Bıyl da sý nysandaryn jóndeýge, sorǵylardy, ysyrmalardy jáne sý ótkizetin qubyrlardy aýystyrýǵa, eseptegish quraldardy ornatýǵa qarajat bólindi. Sonyń arqasynda Egindikól jáne Poltavka aýyldarynda sý munaralary jóndeledi. Al Abaı, Juldyz jáne Jalmanqulaq aýyldarynda sýdy tazartýǵa arnalǵan blok-modýlder ornatylady.
Osy jyly keminde 80 aýyldy aýyzsýmen qamtý josparlanǵan. Osylaısha, jalpy sany 148 aýyl taza aýyzsýǵa qol jetkizedi. Sonymen qatar Kókshetaý, Qosshy, Makınsk jáne Ereımentaý qalalarynda jáne aýyldyq okrýgterde jobalar iske asyrylyp jatyr. Qazirgi tańda Aqmola oblysynda ortalyqtandyrylǵan sýmen qamtýdyń kórsetkishi qalalarda – 99%, aýyldarda 96,6%-dy quraıdy.