Innovasııa – ıgilikti is

Investısııalar jáne damý mınıstri Áset Isekeshevtiń ońtústik astanaǵa jumys sapary eki máseleni qamtydy. Almatydaǵy ınnovasııalyq klasterdiń damý jaǵdaılary talqylandy jáne «Nurly Jol» memlekettik baǵdarlamasynyń «Ortalyq – Ońtústik» jobasy aıasynda rekonstrýksııa jasalyp jatqan «Almaty – Qorǵas», «Almaty – Qapshaǵaı» joldarynyń barlyq merdigerleriniń qatysýymen kóshpeli keńes ótkizildi. Skolkovo (Reseıdegi kremnıı alqaby) qory uıymdastyrǵan Almaty Management university «Startap-týr 2015»-tegi qa­zaqstandyq kezeń qatysýshylaryn qut­tyqtaı kele, Á.Isekeshev Almaty Tech Garden ınnovasııalyq klasteriniń Ortalyq Azııadaǵy mańdaıaldy startap-hab jáne burynǵy keńestik keńistiktegi kóshbasshylardyń biri bolýy tıis ekendigin atap kórsetti. Bul ashyq túrdegi ekologııalyq júıe úrdisi bolmaq. Biz bul maq­sattaǵy ba­symdyqtardy aıqyndap ta qoıdyq. Birte-birte «aqyldy ındýstrııa», «aqyl­dy qala», ómir ekologııasy, elek­trondy kom­mersııa men medıa mamandyqtary paı­da bolyp qalyp­taspaq, dedi mınıstr. Onyń aıtýynsha, bul rette Alma­tyda múm­kindikter kóp-aq. Mun­da sońǵy eki-úsh jylda ǵana myń­nan astam onlaın-bıznes­ter qu­ry­l­ǵandyǵy osyny aıǵaqtaıdy. Qazaqstandyq startaptar úshin Skol­kovomen yntymaqtasyq – óz bıznes strategııalaryn bekemdep qurý úshin jaqsy múmkindik bolyp tabylady. Sóıtip, olar aldaǵy ýaqytta búkil burynǵy keńestik keńistikte jumys isteı alady, dep málimdedi sala basshysy. Bir aı­ta keterlik jaıt, osynyń aldynda Á.Ise­keshev iri bıznes ókilderimen kezdesip, elde osy oraıdaǵy ózgeshe bıznesmender klýbyn jasaqtaý maqsatyn alǵa tartqan edi. Ol klýb memleketpen birlesip, Al­matynyń ınnovasııalyq klasterin damy­tý jolynda jumys istese – qandaı ǵanıbet. О́z kezeginde Skolkovo qory­nyń ınnovasııa jónindegi aǵa vıse-prezıdenti Vasılıı Belov osynaý forýmǵa 160-tan astam kompanııa óz usynymdaryn ji­bergenin jetkizdi. Startap-týr-2015-tiń qazaqstandyq ke­zeńine onnan astam venchýrlyq qorlardyń ókilderi kelip, olar da úzdik kompanııalarǵa ınvestısııa quıýǵa daıyn ekendigin bildirdi. Startaptardy qoldaý jahan­dyq ınnovasııalardy qoldaý pálsafasyna saı keledi. Bú­ginde ınnovasııalyq jobalar jahandyq maqsattar kózdep, halyqaralyq rynokqa shyǵa alǵan jaǵdaıda ǵana tabysty bolmaq. Osy turǵydan kelgende biz­diń memleketterimizdiń arasyn­da jolǵa qoıylǵan Eýrazııa­lyq eko­no­mıkalyq keńistik – ınnovasııalar­dy qol­daý oraıyndaǵy ortaq baǵ­dar­lamalardy damytýdyń jaqsy irge­tasy, dep qadap aıtty V.Belov. 15 úzdik joba jeńimpazdary aldaǵy jazda Reseıdiń Skolkovosynda ótetin Start Up Village jabyq is-sharasyna qatysýdyń sırek múmkindigine ıe bolmaq. Almaty oblysyndaǵy jańa qury­lys maýsymy «Nurly Jol» memle­ket­tik baǵdarlamasyn iske asyrý aıasynda sóreden shyqty. Ol «Almaty – Qapshaǵaı», «Almaty – Taldyqorǵan», «Qapshaǵaı – Taldyqorǵan», BAKAD syndy tórt jobany, sondaı-aq, Batys Eýropa – Batys Qytaı halyqaralyq dáliziniń «Almaty – Qorǵas» bóligin qamtıdy, dedi Áset Isekeshev kóshpeli keńesti ashyp turyp. Rekonstrýksııa jasaý oraıyndaǵy osy jobalar sheńberinde 555 shaqyrym joldar qamtylǵan. 2015 jyly avtomobıl joldary salasynda 100 myńnan astam adam jumys isteıdi dep josparlanǵan. Olardyń 72 myńy «Nurly Jol» aıasyndaǵy jobalardy iske asyrýǵa qatyspaq. Mınıstrdiń aıtýynsha, qyzmetter men jumystardaǵy otandyq mazmun 95 paıyzǵa jetpek. «Batys Eýropa – Batys Qytaı» halyq­aralyq dálizi bıyl tolyq aıaqtalady. Al «Almaty – Qorǵas» arasyndaǵy sońǵy bóligi kelesi jyly salynyp bitedi. Osyǵan baılanysty barlyq qarjylyq, tehnologııalyq, uıymdastyrý máseleleri sheshilgen, jumys qarqyndy júrip jatyr, dep atap kórsetti vedomstvo basshysy. Onyń aıtýynsha, quny 124 mıllıard teńge turatyn birinshi BAKAD konsessııalyq jobasynyń qurylysy 2016 jylǵa belgilengen. Tenderge qatysýǵa qazirdiń ózinde 70-ten astam kompanııadan ótinim túsken. Sonyń ishinde sheteldik kompanııa­lar da bar. Qorǵanbek AMANJOL, «Egemen Qazaqstan». ALMATY.