Áleýmettik ahýalǵa – aıryqsha nazar

Bizdiń basty maqsat – jumystan qysqartý men jalaqy kólemin azaıtýǵa jol bermeý. Elbasy osy oraıda «Jumyspen qamtýdyń jol kartasy» baǵdarlamasyna qoldaý bildirip otyr. Bıyl osy baǵdarlamany iske asyrýǵa 37 mlrd. teńge bólindi, dedi Premer-mınıstrdiń orynbasary Berdibek Saparbaev Atyraý oblysynyń áleýmettik sala ókilderimen kez­desýinde. Máselen, elimizdiń batys, shyǵys óńirleriniń munaı, tústi metall salalarynda jumyssyzdyq oryn almaýy kerek. Osy maqsatta otandyq, sheteldik ınvestorlarmen birlesken iri kásiporyndarmen jumyssyzdyqty boldyrmaý jáne jalaqy azaıtpaý týraly memorandýmǵa qol qoıyldy. Premer-mınıstrdiń orynbasary Berdibek Saparbaevtyń aıtýynsha, elimizde kem degende 400 myń jumys ornyn ashýdyń qam-qareketi jasalyp jatyr. Ras, kez kelgen kásiporyn básekege qabiletti ári bilikti mamandardy ǵana jumysqa tartýdy kózdeıdi. Al orta arnaýly jáne joǵary oqý oryndaryn bitiretin mamandardyń bári birdeı bilikti, básekege qabiletti me? Olardyń qansha paıyzy jumysqa ornalasa alady? «Statıstıkalyq málimet boıynsha, kásiptik kolledjderdi bitirgen mamandardyń 70 paıyzy jumysqa ornalasatyny jóninde derek bar. Bul kórsetkish Atyraý oblysynda budan da joǵary. Alaıda, bul naqty derek bolmaýy múmkin», dedi Berdibek Mashbekuly. Aldaǵy ýaqytta mamandar daıarlaý máselesine ózgerister engizilgeli otyr. Máselen, qazir zańger, ekonomıst mamandyqtary joǵary oqý oryndarynyń kópshiliginde daıarlanady. Alaıda, zańgerlerdi, ne ekonomısterdi daıarlaıtyn mamandanǵan oqý oryndary bar emes pe? Nege ony kez kelgen oqý orny daıarlaýy qajet? Eńbek naryǵy zerttelip, halyqaralyq talapqa sáıkes bilikti mamandar daıarlaýdyń qajettigine mán berilýi tıis. Sonda ǵana syrttan keletin mamandardy azaıta alamyz, degen Berdibek Saparbaevtyń málim etýinshe, jumyssyzdyqty boldyrmaý úshin monıtorıng, zertteý­ler júrgizilgeni jón. Sol kezde jumyssyzdyq máselesi týyndamaıtyny anyq. О́ńir basshysy Baqtyqoja Izmuhambetovpen birge «ARES Petrotehnık» halyqaralyq oqý ortalyǵy men Nazarbaev zııatkerlik mektebiniń, «Mıras» balabaqshasy men oblystyq balalar aýrýhanasynyń, sonymen birge, Atyraý munaı óńdeý zaýytynyń, eshki jáne sıyr sútinen birneshe ónim daıyndaıtyn fermalardyń jumysymen keńirek tanysqan Berdibek Mashbekuly «Bizdiń elimiz buǵan deıingi daǵdarysty da tabys­ty eńserdi. Máselen, 2007-2009 jyldarǵy daǵdarys kezinde elimizde 1 mıllıonnan astam adamnyń jumystan qysqaryp ketýi múmkin edi. Alaıda, oǵan jol berilgen joq. Bul, árıne, elimizdegi júrgizilip kele jatqan nátıjeli áleýmettik saıasattyń jemisi. Eń bastysy, saıası turaqtylyqtyń, yntymaq pen qoǵamdyq kelisimniń jemisi. Memleket halyqtyń áleý­mettik turmysyn, ál-aýqa­tyn udaıy nazarda ustap keledi. Elimizde turaqtylyq pen ynty­maq­ty, qoǵamdyq kelisimdi nyǵaıtý jónindegi tıimdi saıasattyń arqa­syn­da barlyq qıyndyqty eńsere­miz», dep atap kórsetti Premer-mınıstrdiń orynbasary Berdibek Saparbaev. Joldasbek ShО́PEǴUL, «Egemen Qazaqstan». Atyraý oblysy.