Elbasy Týnıs Respýblıkasynyń Prezıdenti Bedjı Kaıd As-Sebsıge «Bardo» ulttyq murajaıynda bolǵan terrorlyq áreketke baılanysty kóńil aıtý jedelhatyn joldady, dep habarlady Prezıdenttiń baspasóz qyzmeti.
Jedelhatta terrorlyq áreket saldarynan Týnıstiń jáne sheteldiń biraz azamatynyń qaza bolǵany týraly sýyt habardy Memleket basshysynyń zor kúızelispen qabyldaǵany aıtylǵan.
«Qazaqstan barsha álemdegi qaýipsizdik pen beıbitshilikke eleýli qaýip tóndirip otyrǵan halyqaralyq ekstremızm men terrorızm áreketterin úzildi-kesildi aıyptaıdy. Biz dúnıejúzilik qaýymdastyqtyń osy qaterlerge qarsy kúrestegi kúsh-jigeri men qadamdaryn tolyǵymen qoldaımyz», – delingen jedelhatta.
Nursultan Nazarbaev qaza tapqandardyń týǵan-týystary men jaqyndaryna, sondaı-aq barsha Týnıs Respýblıkasy halqyna Qazaqstan halqynyń jáne jeke óziniń atynan shyn nıetpen kóńil aıtyp, zardap shekkenderdiń tezirek saýyǵyp ketýine tilektestigin bildirdi.