Qazaqstanda bankter men mıkroqarjy uıymdary nesıe berý erejelerin qatańdatady. Qarjy naryǵyn retteý jáne damytý agenttiginiń (QNRDA) jańa qaýlysy halyqtyń shamadan tys qaryzǵa batýynyń aldyn alýǵa baǵyttalǵan. Eger qaryz alýshynyń aılyq tabysy eń tómengi kúnkóris deńgeıinen tómen bolsa, oǵan nesıe rásimdelmeıdi. Sondaı-aq adamnyń barlyq nesıeleri aılyq tabysynyń 50%-ynan asyp ketse, jańa qaryz alý múmkin bolmaıdy, dep jazady Egemen.kz.
Bankten alǵan nesıe boıynsha 30 kúnnen astam, al mıkroqarjylyq qaryzdy 1 kúnnen artyq keshiktirgenderge nesıe berilmeıdi. Keıingi úsh jylda qaryzy tolyq keshirilgen azamattarǵa da jańa nesıe alý qıyndaıdy. Al kepilsiz tutynýshylyq nesıe merzimi 5 jyldan aspaýy tıis.
Qaıta qurylymdaýǵa qatysty da talaptar kúsheıedi. Eger qaryz alýshy keıingi bir jylda qaryzyn qaıta qurylymdasa, biraq 6 aı ishinde tólemi 5%-ǵa azaımasa nemese jyl ishinde eki retten artyq qaıta qurylymdaý jasasa,nesıe rásimdeý múmkin bolmaıdy. Sonymen qatar eger syıaqy somasy negizgi qaryzdyń 20%-ynan asyp ketse nemese burynǵy qaryzdy jańa nesıe arqyly jabý kózdelse, mundaı jaǵdaıda da nesıe berilmeıdi.
Eń qatań talap sońǵy bir jylda qaryzyn 90 kúnnen astam keshiktirgenderge qoıylady. Qaryzǵa qyzmet kórsetý koeffısıenti eki ese qysqarady, ıaǵnı aılyq tabysynyń tek 25%-yna deıin ǵana qaryz tóleýge ruqsat beriledi. Bul azamattardyń aı saıynǵy tabysynyń tórtten birinen artyq bóligi nesıe tólemine jumsalmaýy tıis degendi bildiredi.
QNRDA dereginshe, qazirgi tańda mıkroqarjy uıymdarynyń portfeliniń tórtten bir bóligi merzimi ótken qaryzdarǵa tıesili. Al halyqtyń moınyndaǵy jalpy kredıt kólemi 24 trln teńgeden asyp ketken. Jańa talaptar táýekeli joǵary qaryz alýshylardy shekteýge baǵyttalǵan.