Qorǵanys mınıstri, avıasııa general-leıtenanty Dáýren Qosanov áskerı oqý oryndarynyń professorlyq-oqytýshylyq quramy men kýrsanttarǵa arnap sóz sóılep, jańa oqý jylynyń bastalýymen quttyqtady. Ol áskerı bilim berýdiń mańyzdylyǵyna toqtalyp, salanyń aldynda turǵan basty mindetterdi atap ótti, dep habarlaıdy Egemen.kz.
Mınıstr Memleket basshysy tamyz konferensııasynda aıtqan bilim men tárbıeniń ulttyń básekege qabilettiligin aıqyndaıtyn sheshýshi faktor ekendigi jónindegi tujyrymdardy eske salyp, bul qaǵıdattyń áskerı bilim berý salasyna da tolyqtaı qatysty ekenin jetkizdi.
«Tamyz konferensııasynda Memleket basshysy bilim berý men tárbıeniń ulttyń básekege qabilettiligin aıqyndaıtyn basty negiz ekenine nazar aýdardy. Bul tujyrymdar tikeleı áskerı bilim berý salasyna da qatysty, sebebi munda armııanyń zııatkerlik jáne kásibı áleýeti qalyptasady», dedi ol.
Dáýren Qosanov áskerı mamandardy daıarlaýdyń sapasyn arttyrýǵa baǵyttalǵan jańashyldyqtardy atady. Máselen, Ulttyq qorǵanys ýnıversıtetinde jumyldyrý daıyndyǵy fakýlteti ashyldy, «Jas ulan» mektepteri áskerı kolledjder mártebesine ıe boldy, al jaýyngerlik daıarlyq jospary oqý úderisimen ıntegrasııalandy.
«Qazirgi jaǵdaıda aqparattyq-kommýnıkasııalyq tehnologııalar, radıoelektrondyq kúres, jasandy ıntellekt pen joǵary ónimdi esepteý júıeleriniń mańyzy aıtarlyqtaı artyp otyr. Bul júıeler urys áreketterin modeldeýge jáne sheshim qabyldaýǵa ıntellektýaldy qoldaý kórsetýge múmkindik beredi. Munyń bári áskerı kadrlardy daıarlaýǵa jańa talaptar qoıady. Olar eń kúrdeli tehnıka men zamanaýı qarý-jaraqty qoldana alýy, gıbrıdti qaýip-qater jaǵdaıynda áreket etip, ózgermeli ahýalǵa tez beıimdelýi tıis», dedi mınıstr.
Vedomstvo basshysy oqý baǵdarlamalaryn jańartý, mamandyqtardyń aıasyn keńeıtý, bilim alýshylardyń akademııalyq utqyrlyǵyn arttyrý, olardy ǵylymı-zertteý jumystaryna, qoldanbaly jobalarǵa jáne halyqaralyq seriktestikke belsendi tartý mindetterin júktedi. Sondaı-aq áskerı oqý oryndaryn zamanaýı qarý-jaraqpen, brondy tehnıkamen, áskerı avtokóliktermen, arnaıy jabdyqtarmen, barlaý jáne baılanys júıelerimen qamtamasyz etý, sonymen birge oq atý jáne júrgizýge arnalǵan trenajerlardy engizý tapsyryldy.
Sóz sońynda Dáýren Qosanov áskerı pedagogtardyń tabandy eńbeginiń arqasynda qoıylǵan mindetter oryndalyp, eldiń áskerı qaýipsizdigi men egemendigin nyǵaıtýǵa eleýli úles qosylatynyna senim bildirdi.