Qorǵanys mınıstrliginde Qazaqstan Respýblıkasy Qorǵanys mınıstriniń birinshi orynbasary – Qarýly kúshteri Bas shtabynyń bastyǵy general-leıtenant Sultan Qamaletdınovtyń tóraǵalyǵymen vedomstvoaralyq keńes ótti, dep habarlaıdy Egemen.kz.
Jıynda kóktemgi kezeńde Qarýly kúshterdi, basqa da áskerler men áskerı quralymdardy jasaqtaý qorytyndylary shyǵarylyp, aldaǵy kúzgi áskerge shaqyrý naýqanyna qoıylatyn mindetter belgilendi.
Keńeske Qarýly kúshter túrleriniń bas qolbasshylary, vedomstvonyń departamentteri men bas basqarmalarynyń basshylary, Qazaqstan Respýblıkasy Ulttyq qorǵanys ýnıversıteti, Bas áskerı prokýratýra, Densaýlyq saqtaý, Ishki ister, Tótenshe jaǵdaılar mınıstrlikteri, Memlekettik kúzet qyzmeti, UQK Shekara qyzmeti men Ulttyq ulannyń ókilderi qatysty. Sonymen qatar óńirlik shaqyrý jáne medısınalyq komıssııalardyń tóraǵalary men ózge de laýazymdy tulǵalar beınekonferensııa baılanysy arqyly qosyldy.
Basty baıandama jasaǵan QR Qarýly kúshteri Bas shtaby Uıymdastyrý-jumyldyrý jumystary departamentiniń bastyǵy general-maıor Almas Isabekov Úkimettiń áskerge shaqyrýdy uıymdastyrý jónindegi tapsyrmalaryn oryndaýdyń mańyzdylyǵyn eske saldy.
Áskerge shaqyrý komıssııalarynyń tóraǵalary – Almaty qalasy ákimi apparatynyń basshysy Erlan Isabekov pen Qostanaı oblysy ákiminiń orynbasary Baqytjan Narymbetov tapsyrmalardyń oryndalýy jóninde esep berdi.
Keńesti qorytyndylaǵan Qorǵanys mınıstriniń birinshi orynbasary general-leıtenant Sultan Qamaletdınov medısınalyq komıssııalardy qajetti dáriger-mamandarmen tolyqtyrý, shaqyrý pýnktterin medısınalyq qural-jabdyqtarmen qamtamasyz etý máseleleriniń áli de ózekti ekenin atap ótti. Alys aımaqtarda shaqyrý pýnktteriniń Densaýlyq saqtaý mınıstrliginiń aqparattyq júıelerine qosylý máselesi tolyq sheshilmegen.
Osyǵan baılanysty general-leıtenant Sultan Qamaletdınov kúzgi shaqyrý naýqanyn uıymdastyrý jáne ótkizý boıynsha negizgi mindetterdi atap ótti. Áskerge shaqyrylýshylardyń medısınalyq tekserý sapasyn arttyrý, komıssııalardy tar beıindi bilikti mamandarmen qamtamasyz etý qajettiligine erekshe nazar aýdaryldy.
Quqyqtyq tártipti qamtamasyz etý men shaqyrýǵa qatysty zańnamalyq rásimderdiń oryndalýyna ishki ister organdary men áskerı polısııa bólimsheleri jaýapty.
Sondaı-aq Qorǵanys mınıstrliginiń Tárbıe jáne ıdeologııalyq jumys departamenti men ortalyq memlekettik, jergilikti atqarýshy organdardyń áskerı-patrıottyq tárbıeni uıymdastyrýda tyǵyz yqpaldastyqta jumys isteýiniń mańyzdylyǵy atap ótildi.
Jergilikti atqarýshy organdardyń áskerge shaqyrý komıssııalary jumysynyń sapasyna baǵa kelesi vedomstvoaralyq keńeste beriletini aıtyldy.