Otbasynyń sıfrlyq kartasyn (OSK) engizýdiń nátıjesinde bıylǵy segiz aıda áleýmettik-eńbek salasyndaǵy memlekettik qyzmetterdi proaktıvti kórsetý qarqyndy júrgizildi. 349,7 myń adamǵa SMS-habarlama joldanyp, 200 myńnan astam adam ótinish bermeı-aq járdemaqy nemese tólem aldy.
Eńbek jáne halyqty áleýmettik qorǵaý mınıstrliginiń málimetinshe, OSK memlekettik organdardyń qoldanystaǵy barlyq aqparattyq júıeleriniń derekteri negizinde qalyptastyrylady. Búginde elimizdiń 20,2 mln azamaty (6,2 mln-nan astam otbasy) týraly aqparat jınaqtalǵan.
OSK engizýdiń basty maqsaty – el azamattarynyń memlekettik qoldaý júıesine teń qoljetimdiligin qamtamasyz etý. Áleýmettik kodekste OSK áleýmettik saıasattyń orta jáne uzaqmerzimdi mindetteri men baǵyttaryn aıqyndaý quraly retinde belgilengen. Sondaı-aq OSK azamattardyń áleýmettik mártebesine baılanysty kepildendirilgen memlekettik qoldaýdyń da bir túri.
Qazirde OSK memlekettik qoldaý sharalaryn alýǵa quqyǵy bar jandarǵa qandaı da bir ótinishsiz járdemaqylar men áleýmettik tólemderdiń 11 túrin resimdeýge múmkindik beredi. Olar: eńbek etý qabiletinen aırylǵan jaǵdaıda áleýmettik tólem; jumysynan aırylǵan jaǵdaıda áleýmettik tólem; asyraýshysynan aıyrylý boıynsha áleýmettik tólem; balanyń týýyna, bala bir jarym jasqa tolǵanǵa deıin onyń kútimine baılanysty járdemaqylar; múgedektigi bar balany tárbıelep otyrǵan ata-anasyna (qamqorshysyna) járdemaqy; múgedektigi boıynsha járdemaqy; kópbalaly otbasylarǵa beriletin járdemaqy; «Altyn alqa», «Kúmis alqamen» marapattalǵan kópbalaly analarǵa beriletin járdemaqy; ataýly áleýmettik kómek; sondaı-aq jerleýge arnalǵan birjolǵy tólem.
Memlekettik qoldaý sharalaryn alýǵa quqyq belgilengen kezde OSK alýshyǵa 1414 biryńǵaı baılanys ortalyǵynan SMS-habarlama jiberiledi. Habarlama alǵan azamat oǵan kelisimi týraly jaýap berýi kerek. О́tinishti rásimdeý, áleýmettik járdemaqy nemese tólem taǵaıyndaý avtomatty rejimde iske asady. Sodan keıin aqsha qarajaty alýshynyń bank shotyna aýdarylady.