Baıraqty báseke jarty joldan asty

Aldymen qyzdarymyzdyń qarqyny jóninde. Ulttyq qu­ra­manyń bas bapkeri Eldos Saı­dalın úkilep qosqan burymdy boksshylarǵa da zor senim artyl­ǵan. Úsh dúrkin álem chempıony, Parıj Olımpıadasynyń qola júldegeri Nazym Qyzaıbaı (48 kg) alǵashqy jekpe-jeginde majarlyq Lılla Seleskıdi 3-raýndta tehnıkalyq nokaýtpen aıqyn jeńdi. Endi jartylaı fınalǵa shyǵar jolda ýkraın qyzy Anna Ohotamen aıqasady. Anna Ýkraınanyń qyzdar komandasynda shırek fınalǵa jetken jalǵyz sportshy. Qalǵan toǵyz salmaqtaǵy úmit artqan sańlaqtary alǵashqy aınalymnan asa alǵan joq. 51 kg salmaqta álem chempıony Alýa Balqybekova shırek fınaldyq saıysta taıpeılik I-Sıýan Gýony aıqyn jeńip, jartylaı fınalǵa ótti.

54 salmaqta synǵa túsken Elına Bazarova birinshi jek­pe-jeginde ózbekstandyq Nıgı­na Ýktamovaǵa ese jiberdi. Karına Ibragımova (57 kg) aldymen grek qyzy Panagıota Kýzılýdy, ekinshi jekpe-jeginde brıtandyq Elıza Glındi  jeńgen edi. Biraq shırek fınalda Parıj Olımpıadasynyń kúmis júldegeri polıak Iýlııa She­remetadan aılasyn asyra almady.

Álem chempıonatynyń kúmis júldegeri Vıktorııa Grafeeva (60 kg) ózbek boksshysy Sıtora Turdybekovany jeńip, jartylaı fınalǵa shyqty. 1-raýndta tóreshiler teń upaı jazǵan, qal­ǵan eki raýndta Vıktorııa qar­qy­nyn údetip, jeńisti julyp aldy.

Álem chempıony Aıda Ábikeeva (65 kg) birinshi jekpe-jeginde majar qyzy Lýısa Hamorıdi, ekinshi aıqasynda káris Sýıong Kangty erkin eńserip, shırek fınalda Tokıo Olımpıadasynyń chempıo­ny, Túrkııa eliniń úmiti Býsenaz Súrmenelimen qolǵap túıistirdi. Aıda tájirıbeli boksshynyń bedelinen yqqan joq, kerisinshe, túre qýyp júrip uryp, taza jeńiske jetti. Býsenaz jekpe-jekten keıin bizdiń boksshynyń mańdaıynan súıip, sheberligine tánti ekenin ańǵartty. Aıdanyń da enshisinde keminde qola medal bar.

70 kg salmaqta Natalıa Bogda­nova da shırek fınaldyq sa­ıysta túrik boksshysy Sema Chalyshkannan basym tústi. 75 kg salmaqta synǵa túsken Nadejda Rebıastiń Lıverpýlge sapary sátsiz boldy. Ol alǵashqy aınalymda qytaılyq Lına Vangke ese jiberdi. Gúlsaıa Erjan (80 kg) da jartylaı fınalǵa jetpeı toqtady. Aýstralııalyq Eseta Flınt bizdiń qyzdan basym tústi. Asa aýyr salmaqta (80 kılodan joǵary) rıngke shyqqan Eldana Tálipova jańazelandııalyq Elın  Lı Lony jeńip, jartylaı fınalǵa shyqty.

Qaırat Sátjanov bastaǵan bapkerler quramy úkilep qosqan jigitterge ózbek boksshylary alynbas qamalǵa aınalǵandaı. Birneshe sańlaǵymyz qudaıy kórshimizdiń oǵlandarynan utyldy. Jeńil salmaqta (50 kg) synǵa túsken álem chempıony Sanjar Táshkenbaı alǵashqy aınalymda ıordanııalyq Hýtaıfa Eshıshti jeńdi.  Jartylaı fınalǵa shyǵý úshin búgin úndistandyq Jadýmanı Mandengvanga qarsy aıqasady. Álem chempıony Mahmud Sabyrhan (55 kg) aldymen kosovalyq Bashkım Baıokýdi nokaýtqa túsirip, shırek fınalda japon Rýı Iаmagýchıdi jeńip, jartylaı fınalǵa ótti. Endi qytaılyq Lıý Chýangty eńserse, altyn medal úshin aıqasqa túsedi.

Eresekter arasyndaǵy álem­dik dodaǵa tuńǵysh ret qatysqan Beıbarys Jeksen (60 kg) ózbek boksshysyna ese jiberdi. Alǵash­qy básekede úndistandyq Sachın­di jeńgen ol shırek fınalda О́zbekstan maqtanyshy álem chempıony, Parıj Olımpıa­dasynyń jeńimpazy Abdýmalık Halokovten asa almady. 65 kg salmaq dárejesinde Ertýǵan Zeınýllınov te ózbekstandyq sańlaq, Parıj Olımpıadasynyń chempıony Asadhýdja Mýıdın­hýjaevqa ese jiberdi. 70 kg sal­maqta Tórehan Sabyrhan shırek fınalda fransýz Makan Traoreni aıqyn basymdyqpen jeńdi. Endi erteń jartylaı fınalda brıtandyq Odel Kamaraǵa qarsy aıqasqa túsedi. 75 kg salmaqta Sabyrjan Aqqalyqov ýkraınalyq Pavel Ilıýshadan utyldy. 80 kg salmaq dárejesinde Nurbek Oralbaı ózbek Javohır Ýmmatalıevten asa almaı, júl­deden qol úzdi.

Álem chempıony tájirıbeli boksshy  Bekzat Nurdáýletov (85 kg) Lıverpýl rıngine bir-aq ret shyqty. Alǵashqy aıqasynda grýzın Georgıı Kýshıtashvılıden jeńildi. 90 salmaqta Saǵyndyq Toǵambaıdy shırek fınalda ózbek Turarbek Habıbýllaev toqtatty. 90 kg-dan joǵary salmaqta Parıj Olımpıadasynyń kúmis júldegeri Aıbek Oralbaı horvat Lýka Pratlıachty jeńdi. Ulttyq quramanyń kapıtany jartylaı fınalda eki dúrkin Olımpıada chempıony, álem chempıonattarynda 5 márte jeńiske jetken kýbalyq Hýlıo Sezar La Krýzge qarsy aıqasady. 36 jastaǵy kýba­lyqty 2019 jyly Reseıde ótken álem chempıonatynyń jartylaı fınalynda Bekzad Nurdáýletov eseńgirete utqan edi.