ASTANA. 20 naýryz. Burnaǵy kúni Aqordadaǵy dıplomatııalyq kezdesýler barysynda AQSh-tyń Qazaqstandaǵy jańa taǵaıyndalǵan elshisi Djorj Klor Elbasynyń aldynda qazaq tilinde baıandama jasady. Bul týraly egemen.kz habarlady.
Resmı baıandamasynyń álqıssasyn qazaq tilinde jatqa sóıleýden bastaǵan elshi myrza artynsha arnaıy jazylǵan mátinin qaǵazǵa qarap oqydy. Baıandamasyn aıaqtaǵan elshi Djorj Klor myrza Elbasy Nursultan Ábishulyna senim gramotasyn tapsyrdy. Al Qazaqstanǵa kelgenine kóp bolmaǵan elshi myrzanyń resmı baıandamasyn memlekettik tilde jasaǵanyna Elbasy óz rızashylyǵyn bildirdi.
Sondaı-aq, búgin Aqordada Elbasymen kezdesken Kýveıt, Pákstan, Saýd Arabııasy jáne basqa da elshiler aýdarmashynyń kómegine júginse, Bolgarııanyń Qazaqstandaǵy elshisi óz baıandamasyn orys tilinde jasaǵan.
Elbasy Nursultan Nazarbaevtyń aldynda baıandamalaryn jasap, senim gramotalaryn tapsyryp bolǵan elshi myrzalar jýrnalısterge suhbat berdi. Amerıkalyq dıplomat bul jerde de ózin aıryqsha tanytyp, jýrnalısterge qazaq tilinde suhbat berdi. AQSh elshisinen keıin sóz alǵan Bolgarııa elshisi jýrnalısterdiń aldynda bir-eki aýyz sózin qazaq tilinde aıtýǵa áreket etti.
Bir aıta ketetini, AQSh-tyń elshisi Qazaqstanǵa kelgenine kóp ýaqyt bolmasa da, óziniń osy elge degen qurmetin osylaısha bildirdi. Jýrnalısterge resmı málimdeme jasaǵan Djorj Klor myrza ózine qazaqtyń ulttyq ashanasyn qatty unatatynyn jáne qymyz ben shubattyń dámi til úıiretinin de jetkizdi.
Murat Aıtqoja.