Arnaıy salyq rejımimen jumys isteýge múmkindik alatyn, sondaı-aq bul jeńildik berilmeıtin kásipkerlik qyzmet túrleriniń aldyn ala tizbeleri aptanyń sońyna deıin «Ashyq NQA» portalynda jarııalanady. Aldyn ala baǵalaýlar boıynsha jeńildetilgen deklarasııa negizindegi arnaıy salyq rejımi eldegi barlyq salyq tóleýshilerdiń shamamen 70%-yna qoldanylady. Bul týraly Premer-mınıstrdiń orynbasary – ulttyq ekonomıka mınıstri Serik Jumanǵarın Astanadaǵy jańa Salyq kodeksin túsindirý jónindegi semınarda málimdedi, dep jazady Egemen.kz.
Serik Jumanǵarın aıtqandaı, ońaılatylǵan rejımmen jeke tulǵalarǵa bólshek saýda qyzmetin kórsetetin kásipkerler ǵana jumys isteı alady. Zańdy tulǵalarmen jumys isteıtin kompanııalar tolyqqandy býhgalterlik esep pen shegerim qoldanylýy qajet jalpy salyq salý rejımimen jumys isteıdi.
«Tyıym salý» dep atalatyn tizimge bızneske arnalǵan taýar óndirip, qyzmet kórsetetin sala kiredi. Bul saladaǵy jıyntyq aınalymnyń 76%-dan astamy jalpyǵa birdeı rejımdi qoldanatyn salyq tóleýshilermen jasalatyn mámilege jatady», dedi Serik Jumanǵarın.Bul óńdeý ónerkásibi, qurylys jáne jer qoınaýyn paıdalaný, tabıǵı monopolııalar, 2 myń sharshy metrden asatyn alańdardaǵy kóterme jáne iri bólshek saýda kásiporyndary. Shekteý telekommýnıkasııa, ınternet jáne IT, qarjylyq jáne saqtandyrý qyzmeti, konsaltıng, kásibı jáne agenttik, sondaı-aq ǵylymı zertteýler men ázirlemeler sektoryna qoldanylady.Atap ótilgendeı, jekelegen sektorlarda mundaı operasııalardyń úlesi is júzinde 100%-ǵa jetedi: qurylysta – 99,9%, jer qoınaýyn paıdalanýda – 98,7%, kólik pen qoımada – 96,7%. Bul sandar búginde jeńildetilgen rejımniń edáýir bóligin shaǵyn bıznes emes, ekonomıkanyń úlken segmentine biriktirilgen iri kompanııalar qoldanatyndyǵyn aıqyn kórsetedi.
«Jalpy alǵanda, sóz ekonomıkalyq qyzmettiń 700-den astam túri týraly bolyp otyr. Bul barlyq EQJJ-niń shamamen 70%-y. Alaıda, salyq tóleýshiler turǵysynan alsaq, jeńildetilgen rejımge tyıym salý kásiporyndardyń shamamen 30%-na ǵana áser etedi», dedi ol.
Jeńildetilgen salyq rejımi saqtalatyn ekinshi topta bıznestiń 300-den astam túri bar. Olardyń qatarynda 2 myń sharshy metrge deıingi saýda alańdaryndaǵy bólshek saýda, dárihanalar, qoǵamdyq tamaqtaný nysandary, qonaq úıler, turǵyn úı men kólikti jalǵa alý, jeńil jáne tamaq ónerkásibi kásiporyndary, jolaýshylar tasymaly, balabaqshalar men úıirmeler, medısınalyq jáne áleýmettik qyzmetter bar. Tizimge halyqqa qajet turmystyq jáne qurylys qyzmeti, kreatıvti ındýstrııanyń jekelegen túrleri, mádenı jáne sporttyq nysandar, sondaı-aq aýyl sharýashylyǵy kiredi.Osylaısha, aldyn ala baǵalaýlar boıynsha jeńildetilgen rejımdi qoldaný barlyq salyq tóleýshilerdiń shamamen 70%-y úshin saqtalady. Bul degenimiz, turǵyndarǵa baǵdarlanǵan shaǵyn bıznestiń negizgi bóligi jeńildetilgen salyq rejımin paıdalanýdy jalǵastyrady degendi bildiredi. Al iri jáne júıelik qyzmet jalpy belgilengen rejımge aýysady.
«Tizimderdiń jobasy áli de ázirlenip jatyr. Aldyn ala tizimdi «Ashyq NQA» portalynda ornalastyrýdy josparlap otyrmyz. Ol jarııalanǵannan keıin bıznespen jáne sarapshylarmen talqylaý jalǵasady», dedi vıse-premer.