Májilis ekinshi oqylymda «Jasandy ıntellekt týraly» zań jobasyn jáne oǵan ilespe túzetýlerdi qabyldady. Zań jobalaryn Memleket basshysynyń tapsyrmasy negizinde depýtattar ázirlep, elimizde jasandy ıntellekt tehnologııasyn damytýǵa quqyqtyq negiz jasady, dep habarlaıdy Egemen.kz.
Zań arqyly alǵash ret jasandy ıntellekt, model, júıe, derekter kitaphanasy, sıntetıkalyq nátıje syndy jańa quqyqtyq uǵymdar ornyqtyrylyp otyr.
Jasandy ıntellektiniń adamdarǵa zııan keltirýi múmkin birqatar fýnksııasyn paıdalanýǵa zań arqyly tyıym salynady:
Adamdardyń sanaly túrde bergen kelisiminsiz minez-qulqyna áser etetin jasandy ıntellektini qoldanýǵa; Adamdardyń álsizdigin (jasy, múgedektigi, áleýmettik jaǵdaıy) ádeıi paıdalanatyn jasandy ıntellektini paıdalanýǵa; Adamdarǵa áleýmettik minez-qulqy nemese sıpattamalary boıynsha baǵa berýge nemese olardy jikteýge (áleýmettik skorıng); Adamdardyń emosııalaryn olardyń kelisiminsiz taldaý úshin jasandy ıntellektini paıdalanýǵa; Zańda ruqsat etilgen jaǵdaılardan basqa naqty ýaqyt rejıminde kópshilik oryndarda bet-álpetti taný úshin jasandy ıntellektini qoldanýǵa; Jasandy ıntellekt qyzmetiniń zańda tyıym salynǵan nátıjelerin jasaýǵa jáne taratýǵa.Sonymen qatar jasandy ıntellekttini ázirleý jáne engizý úshin Ulttyq platforma qurylady. Ol derekter kitaphanalaryna, jasandy ıntellekt ónimderin ázirleý jáne paıdalaný ortasyna qol jetkizýdi qamtamasyz etedi.