El kásipkerlerine jańa jeńildik daıyndalyp jatyr. Apta sońyna deıin «Ashyq NQA» portalynda arnaıy salyq rejimin paıdalana alatyn jáne osy jeńildik júrmeıtin kásip túrleriniń tizimi shyǵady. Bul týraly Astanada ótken jańa Salyq kodeksin túsindirý semınarynda Premer-mınıstrdiń orynbasary – Ulttyq ekonomıka mınıstri Serik Jumanǵarın málimdedi.
Aldyn ala esep boıynsha jeńildetilgen deklarasııa negizindegi salyq júıesin salyq tóleýshilerdiń 70%-y qoldanady. Serik Jumanǵarın aıtqandaı, ońaılatylǵan rejimmen jeke tulǵalarǵa bólshek saýda qyzmetin kórsetetin kásipkerler ǵana jumys isteı alady. Zańdy tulǵalarmen jumys isteıtin kompanııalar tolyqqandy býhgalterlik esep pen shegerim qoldanylýy qajet jalpy salyq salý rejimimen jumys isteıdi.
«Tyıym salý dep atalatyn tizimge bızneske arnalǵan taýar óndirip, qyzmet kórsetetin sala kiredi. Bul saladaǵy jıyntyq aınalymnyń 76%-dan astamy – jalpyǵa birdeı rejimdi qoldanatyn salyq tóleýshiler», dedi Ulttyq ekonomıka mınıstri.
Jeńildetilgen salyq rejimi barlyq kásip túrine berilmeıdi. Bul tizimge óńdeý ónerkásibi, qurylys, jer qoınaýyn paıdalaný, tabıǵı monopolııalar, aýmaǵy 2 myń sharshy metrden asatyn kóterme jáne iri bólshek saýda kásiporyndary kiredi. Sondaı-aq shekteý telekommýnıkasııa, ınternet pen IT, qarjy jáne saqtandyrý, konsaltıng, kásibı jáne agenttik qyzmetter, ǵylymı zertteýler men ázirlemeler salasyna da qoldanylady.
Jeńildetilgen salyq rejimi saqtalatyn ekinshi topta bıznestiń 300-den astam túri – 2 myń sharshy metrge deıingi saýda alańdaryndaǵy bólshek saýda, dárihanalar, qoǵamdyq tamaqtaný nysandary, qonaqúıler, turǵyn úı men kólikti jalǵa alý, jeńil jáne tamaq ónerkásibi kásiporyndary, jolaýshylar tasymaly, balabaqshalar men úıirmeler, medısınalyq jáne áleýmettik qyzmetter bar.
«Tizimderdiń jobasy áli de ázirlenip jatyr. Aldyn ala tizimdi «Ashyq NQA» portalynda ornalastyrýdy josparlap otyrmyz. Ol jarııalanǵannan keıin bıznespen jáne sarapshylarmen talqylaý jalǵasady», dedi vıse-premer.
Qarjy mınıstri Mádı Takıevtiń aıtýynsha, jańa Salyq kodeksindegi mańyzdy ózgeris – banktik shottardy avtomatty túrde buǵattaýdan bas tartý.
«Qarastyrylǵan ózgerister kásipkerlerdiń jumysyn edáýir jeńildetedi. Salyq eseptiligin azaıtý men salyqty azaıtý bızneske qaǵazbastylyqqa emes, damýǵa nazar aýdarýǵa múmkindik beredi. Shottardy avtomatty túrde buǵattaýdan bas tartý – ádil jáne ashyq qarym-qatynasqa qaraı jasalǵan mańyzdy qadam», dep atap ótti Mádı Takıev.
Jańa Salyq kodeksinde birqatar ózgeris qarastyrylǵan. Olardyń ishinde saralanǵan salyq mólsherlemesin engizý, progressıvti jeke tabys salyǵy, sán-saltanat salyǵy jáne arnaıy salyq rejimindegi jańalyqtar bar.
Azamattarǵa qatysty ózgeristerdiń ishinde mańyzdysy – zeınetaqy tólemderiniń jeke tabys salyǵynan bosatylýy. Sondaı-aq 10 jyldan asqan avtokólikter úshin kólik salyǵy tómendeıdi. Múgedektigi bar adamdarǵa arnalǵan salyqtyq shegerimder keńeıtiledi. Áleýmettik mańyzy bar medısınalyq qyzmet túrlerine qosylǵan qun salyǵy boıynsha jeńildik engiziledi. Bıznes úshin de ózgerister bar. Arnaıy salyq rejimderi ońtaılandyrylyp, endi tek úsh túri ǵana qalady. Olar – ózin-ózi jumyspen qamtyǵandarǵa arnalǵan rejim, jeńildetilgen deklarasııa negizindegi shaǵyn bızneske arnalǵan rejim jáne fermerler úshin arnalǵan rejim.