Túrkistan qalasynda qolónershiler qalashyǵynyń resmı ashylý saltanaty ótti. Sondaı-aq Túrkistan qalasynyń halyqaralyq World Craft Council uıymynyń sheshimimen «Qolónershiler qalasy» mártebesine ıe bolýyna oraı «Túrkistan – qolónershiler qalasy» atty halyqaralyq festıval, «Turkistan world craft fest-2025» halyqaralyq qolónershiler kórmesi uıymdastyryldy, dep jazady Egemen.kz.
Halyqaralyq festıvalge Túrkııa, Ázerbaıjan, Qyrǵyzstan, О́zbekstan, Tájikstan, Qytaı jáne Reseı elderinen 100-ge jýyq qolónershi keldi. Elimizdiń ár óńirinen 300-ge jýyq qolóner sheberi qatysty. World Craft Council halyqaralyq uıymynyń qurmetti elshisi Azız Mýrtazaev Túrkistan «Túrkistan– qolónershiler qalasy» mártebesi kýáligin tabystady.
– Bıyl Memleket basshysy Qasym-Jomart Toqaev «Túrkistan qalasynyń erekshe mártebesi týraly» arnaıy zańǵa qol qoıdy. Qabyldanǵan zańda qolóner salasyndaǵy sheberlerge memlekettik qoldaý sharalary kúsheıtilip, jergilikti qolónershilerdiń kásibin damytýǵa jol ashyldy. Ulttyq dástúrdi qoldaý maqsatynda Qolóner qalashyǵynyń qurylysyn júrgizdik. Búgin «Turkistan World Craft Fest» halyqaralyq festıvaline arnaıy jınalǵan álem sheberleri erekshe ortalyqtyń jumysyna jańasha serpin beredi dep senemiz. Uly Jibek jolynyń boıynda ornalasqan tarıhı shahar ejelden qolóner men saýda ortalyǵy bolǵan. Qazirgi tańda oblysymyzda 130-dan astam sheber eńbek etýde. Keshende ulttyq qolónerdiń san túrli baǵyttary toǵysyp, óńirimizge keletin týrıster úshin jańa mádenı ortalyqqa aınalady. Qalashyq tek saýda-sattyq orny ǵana emes. Bul – sheberlerdiń tájirıbe almasatyn, jańa týyndylaryn usynatyn, jastardy ónerge úıretetin úlken ortalyq, – dedi saltanatty rásimde oblys ákimi Nuralhan Kósherov.
Biregeı keshen – ulttyq qolónerdi jańǵyrtý, týrızmdi damytý jáne sheberlerge qoldaý kórsetý maqsatynda júzege asqan mańyzdy joba. Týrıstik jáne mádenı baǵyttaǵy keshen 8 negizgi fýnksıonaldy bólikten turady. 20 sheberhana, kórme zaldary, 2 shoýrým, meıramhana, qonaqúı jáne týrıstik ınfraqurylymy bar qalashyq 2,5 gektar aýmaqty alyp jatyr. Munda sheberler ulttyq naqyshtaǵy buıymdaryn jasap, kópshilikke usynyp qana qoımaı, tejirıbe almasady. Erekshe keshen jeke ınvestısııa esebinen salynǵan.
Saltanatty shara aıasynda 100 keramıka sheberi bir mezgilde qumyra jasady. Qolóner buıymdarynyń kórmeleri, sheberlik saǵattary, ulttyq kıimder men buıymdar jármeńkesi, mádenı-tanymdyq jáne konserttik baǵdarlamalar kópshilik nazaryna usynyldy. «Fashion» etno sán úlgisiniń kórsetilimi ótti. Tanymal ánshiler áýezdi ánderdi shyrqady.
Festıval Dostyq úıinde «Túrkistan qolóner murasy jáne týrızimniń bolashaǵy» atty halyqaralyq qolónershiler forýmyna ulasty. Qazaqstandyq jáne sheteldik uıym basshylary bas qosqan forýmǵa Azııa-Tynyq muhıty aımaǵy boıynsha Dúnıejúzilik qolóner keńesiniń vıse-prezıdenti Aıdarhan Kalıev moderator boldy. Otandyq qolónershilerge sheteldik sheberlermen tájirbıe almasýǵa, ónimderin halyqaralyq deńgeıde nasıhattaýǵa jáne jańa seriktestik baılanystar ornatýǵa múmkindik jasaýdy maqsat etken forýmǵa 70-ten astam sheteldik qonaq, túrli uıym ókilderi, qolónershiler qatysty.
Forýmda sóz alǵan qatysýshylar ulttyq ónerdi ulyqtaýǵa shaqyrdy. Túrkistandy halyqaralyq deńgeıde iri týrızm ortalyǵyna aınaldyrý, qolónerdi jamytý baǵytyndaǵy ıdeıalaryn ortaǵa saldy.
TÚRKISTAN