Búgin – Almatyda fýtbol merekesi. Qurylǵanyna 70 jyldyń bederi bolǵan «Qaırat» fýtbol klýby ÝEFA Chempıondar lıgasynyń jalpy kezeńindegi kezekti matchyna qatysady. Qarsylas – ÝEFA Chempıondar lıgasyn 15 márte jeńgen Ispanııanyń «Real Madrıd» klýby.
Kesheli beri uıqysy qashqan almatylyqtar «Toıdyń bolǵanynan boladysy qyzyq» ekenin sezinip jatyr. Tek shahar turǵyndary ǵana emes, ózge óńirlerden, shetelden tabany tıgen jankúıerler de «Qaırat» pen «Real Madrıd» tartysynyń dańqyn bıiktetip jiberdi. 28 qyrkúıektiń túninde Almatyǵa qonǵan «Real Madrıd» komandasyn uıymdastyrýshylar áýejaıdan sán-saltanatpen qarsy aldy. Segiz saǵat boıy qazbaýyr bulttardyń ústinde qalyqtap jetken qonaqtar at baılap, aıaldaǵan qonaqúıdi mańaılaǵan jankúıerler álem juldyzdarynyń ár qımylyn múlt jibermeı torýyldady.
Koroldik klýbtyń bas bapkeri Habı Alonso qaqpashylar Tıbo Kýrtýa, Andreı Lýnın, Havı Navarro, qorǵaýshylar Davıd Alaba, Raýl Asensıo, Alvaro Karreras, Fran Garsııa, Dın Heısen, Davıd Hımenes, jartylaı qorǵanysta Djýd Bellıngem, Edýardo Kamavınga, Federıko Valberde, Orelen Chýamenı, Arda Gúler, Danı Sebalos, shabýyl shebinde Vınısıýs Jýnıor, Kılıan Mbappe, Endrık, Rodrıgo, Gansalo Garsııa, Braım Dıas, Franko Mastantýonony «Qaıratqa» qarsy matchqa shaqyrtty. Álem fýtbolynyń osyndaı beldi ókilderin kórýge jankúıer qaýymnyń yqylasy artyp, yntyzar bolýy zańdylyq ta.
Mundaı abyr-sabyrda tıynyn puldap, teńgelep paıda kórgisi keletin alypsatarlardyń da aıy ońynan týatyny belgili. Klýb óziniń resmı saıtynda matchtyń bıleti 23 qyrkúıekte keshki saǵat 17:00-den bastap satylatynyn habarlady. Klýbtyń resmı saıty men Ticketon platformasynda satylymǵa shyǵyp, JSN boıynsha bir adamǵa tek eki bılet qana satylatyny aıtyldy. Derekter satyp alý kezinde de, stadıonǵa kirgende de muqııat tekseriletinin eskertti. ÝEFA-men kelisilgen, barlyq oıynǵa biryńǵaı belgilengen bılettiń baǵasy sektorǵa qaraı 30 000-250 000 teńge aralyǵynda satyldy. Baǵa saıasaty týrnır talaptaryna, Chempıondar lıgasy matchtaryn uıymdastyrýdyń halyqaralyq tájirıbesine sáıkes keldi dep málimdedi klýb ókilderi. 300 myńnan astam jankúıer platformaǵa aldyn ala kezekke turdy. Satylymǵa túsken bıletterdi jankúıerler úsh saǵattyń ishinde pyshaq ústinen bólip áketti. Esesine endi áleýmettik jeli betinde bılet satýshylardyń habarlamasy kóz súrindirip tur.
1958 jyly salynǵan Almatydaǵy «Ortalyq stadıonnyń» syıymdylyǵy – 23 804 oryn. Stadıondaǵy oryndardan kvota klýbtyń áleýmettik baǵyttaǵy ustanymdaryna saı paralımpıadalyq sport túrlerimen shuǵyldanýshylarǵa, «Qaırat» akademııasy men klýb fılıaldarynyń bapkerleri men tárbıelenýshilerine, qyzmetkerler men ardager oıynshylarǵa berildi. Sondaı-aq «Qaırattyń» demeýshilerine ekijaqty seriktestikke oraı bıletter berildi. 20 myńnan astam bıletke kúnuzaq kezekke turǵan jankúıerlerdiń kópshiligine matchty stadıonnan tamashalaý oraıy týmady.
«Qaırat» klýbynyń bas bapkeri Rafael Ýrazbahtın búgingi matchtaǵy basty nátıje jeńis ekenin aıtty. «ÝEFA Chempıondar lıgasynyń jalpy kezeńine shyǵyp, álemniń tańdaýly klýbtaryna qarsy oınaý aqıqatqa aınaldy. Biz búgin oıynnyń sapasyna mán berýge kúsh salamyz. 18 qyrkúıekte Lıssabonda «Sportıngke» qarsy ótken oıynda qarsylastyń deńgeıi bizden áldeqaıda joǵary ekeni anyq baıqaldy. Olardyń qysymyna barynsha shydas berdik. Birneshe saǵat ushyp, ersoqty bolyp sharshaǵanymyz da áser etti. Búgin óz alańymyzda álemniń úzdik klýbyna qarsy oınaımyz. «Real Madrıdtiń» bas bapkeri Habı Alonso buǵan deıin Germanııanyń «Baıer» klýbyn baptaǵan kezeńde ár jattyǵý tásilderin ǵalamtordan kórip, tánti bolatyn edik. О́te bilikti bapkerden kóp nárse úırendik», degen Rafael Ýrazbahtın koroldik klýbtyń tizginin ustaǵanyna tórt aı ǵana bolǵan Alonso maqsatyn tolyq iske asyrmaǵanyn, áli de sheberligimen dańqy asqaqtaıtynyn aıtty. О́zi úlgi tutqan bapkerdiń baýlyǵan fýtbolshylaryna qarsy tartysqa túsýdiń jaýapkershiligi zil batpan ekenin de atap ótti.
Almatylyq «Qaırat» búgin madrıdtik «Realǵa» qarsy tartysta qaırat tanyta ala ma? 27 qyrkúıekte Ispanııa La Lıgasynyń kezekti týrynda «Atletıko» oıynshylary «Real» komandasyn 5:2 esebimen oısyrata utty. «Qaırat» el chempıonatyndaǵy mańyzdy matchtyń biri sanalǵan tartysta «Jeńis» klýbyn 3:1 nátıjesimen jeńdi. Bas bapker búgingi tartysta upaı oljalaýǵa barymyzdy salamyz dedi. Laıym solaı bolǵaı.