Memleket basshysy Astana men Býdapesht arasyndaǵy tyǵyz ári senimdi qarym-qatynas ǵasyrlar qoınaýynan tamyr tartatynyn jáne ózara qurmetke negizdelgenin atap ótti, dep habarlaıdy Egemen.kz Aqordanyń baspasóz qyzmetine silteme jasap.
Qazaqstan Prezıdenti ótken jyly Majarstanǵa jasaǵan sapary birqatar mańyzdy kelisimderge qol qoıylýymen erekshelengenin jetkizdi. Bul eki el arasyndaǵy uzaq merzimdi yntymaqtastyq pen baýyrlastyq baılanystardy nyǵaıtý úshin jańa perspektıvaǵa jol ashty.
Memleket basshysynyń aıtýynsha, ekijaqty saýda-ekonomıkalyq qarym-qatynastardyń berik negizi men zor áleýeti bar.
«Byltyr taýar aınalymy shamamen 200 mıllıon dollarǵa jetkenin, al bıylǵy segiz aıda 22 paıyz óskenin (164,5 mıllıon dollar) erekshe yqylaspen atap ótkim keledi. Búginde Qazaqstan ekonomıkasyna 400 mıllıon dollarǵa jýyq ınvestısııa salǵan 35-ten asa majar kompanııasy jumys istep jatyr. Biz qazirdiń ózinde aýyl sharýashylyǵy, jańartylatyn energııa, densaýlyq saqtaý, logıstıka men qarjy salalarynda 607 mıllıon dollarǵa baǵalanatyn 20 birlesken jobany iske asyryp jatyrmyz, dedi Qazaqstan Prezıdenti.
Taraptar mádenı-gýmanıtarlyq yqpaldastyq máselelerine mán berdi. Halyqtarymyzdyń tarıhı jaqyndyǵy men baýyrlastyǵynyń dáleli retinde 2023 jyly Astana kósheleriniń birine kórnekti majar aqyny Shandor Petefıdiń esimi berilgen bolatyn.
Prezıdent jyl saıyn elimizdiń 250 stýdenti majar ýnıversıtetterinde oqıtynyna toqtalyp, bilim almasýdyń mańyzyn atap ótti. Sonymen qatar otandyq joǵary oqý oryndary da majarlyq stýdentter men zertteýshilerdi kóptep qabyldaýǵa daıyn ekenin málimdedi.
Tamash Shýıoktyń aıtýynsha, Qazaqstanmen jan-jaqty baılanystardy damytý Majarstannyń syrtqy saıasatynda aıryqsha oryn alady.
«Halyqtarymyzdyń san ǵasyrdan beri jalǵasqan baılanysynyń tini berik ekenin udaıy baıqap júrmiz. Majarlyqtar ózderiniń shyǵystaǵy túp tarıhyna árdaıym qyzyǵýshylyqpen qaraıdy. Sondyqtan elimiz Shyǵys pen Batys, Ortalyq Azııa men Ortalyq Eýropa arasyndaǵy altyn kópir retinde mıssııasyn únemi atqaryp keledi. Prezıdent myrza atap ótkendeı, 2014 jyly Strategııalyq seriktestik týraly kelisimge qol qoıylyp, bul qarym-qatynasymyzdyń negizin qalady. Ekonomıkalyq yntymaqtastyqtyń aıasy keńeıip kele jatyr. Al mádenıet pen bilim salasyndaǵy yqpaldastyǵymyz kóp jurtqa úlgi. Bul artyq aıtqandyq emes. Qazaqstanmen baılanysymyzdy strategııalyq turǵydan mańyzdy dep sanaımyz ári joǵary baǵalaımyz. Qazirgideı daǵdarys kezeńinde Shyǵys pen Batys arasyndaǵy yntymaqtastyq aıryqsha mánge ıe bola bastady», dedi Majarstan Prezıdenti.
Kelissóz barysynda saýda-ınvestısııa, energetıka sektory, atom energııasy, kólik-logıstıka, qarjy, sıfrlandyrý jáne jasandy ıntellekt sekildi salalardaǵy ekijaqty yntymaqtastyq máseleleri keńinen qarastyryldy.
Memleket basshylary halyqaralyq saıasattyń basty máselelerine qatysty eki eldiń ustanymdary uqsas jáne kópjaqty formattaǵy tyǵyz yqpaldastyqty jalǵastyrýǵa daıyn ekenin rastady.