BE WOMAN ASIA forýmynyń uıymdastyrýshylar komıteti forým barysynda aıtylǵan jekelegen pikirlerge qatysty resmı málimdeme jasady. Komıtettiń aıtýynsha, jeke spıkerdiń pikiri forýmnyń, uıymdastyrýshylardyń nemese qatysýshylardyń ustanymyn bildirmeıdi, dep habarlaıdy Egemen.kz.
«BE WOMAN ASIA forýmy saıasatqa aralaspaıdy. Bizdiń mindetimiz — Ortalyq Azııa áıelderine damıtyn, ózara yntymaqtasatyn orta qurý. Bıyl forýmda 100 spıker, 50 mentor jáne 30 seriktes boldy, 2700 adam qatysty. Is-sharaǵa qatysqan ár áıel bızneste, mansap jolynda, jalpy ómirde paıdaly bolatyndaı bilim men tájirıbe jınasa degen nıetpen aýqymdy baǵdarlama daıyndaǵanbyz», delingen málimdemede.
Komıtet ár spıkermen aldyn ala brıfıng ótkizip, resmı kelisimshartqa qol qoıatynyn atap ótti. Qujatta Qazaqstan Respýblıkasynyń zańnamasyn buzatyn nemese forým men onyń qatysýshylaryna nuqsan keltiretin saıası jáne ózge de málimdemelerge tyıym salynǵan. Sonymen qatar, sahnaǵa shyǵar aldynda spıkerlerge erejeler tolyq túsindiriledi.Alaıda forým tikeleı efırde ótkendikten, bir spıkerdiń sózi reglamentten tys aıtylǵan. Uıymdastyrýshylar mundaı jaǵdaıǵa qapalanǵanyn jáne bul forýmnyń qundylyqtaryna qaıshy ekenin jetkizdi.
«El aldyna shyǵyp sóz sóıleýdiń asa úlken jaýapkershilik ekenin eskere otyryp, sahnaǵa shyqpas buryn spıkerge erejelerdi egjeı-tegjeıine deıin aıtyp túsindiremiz. Degenmen forým tikeleı efırde ótetindikten, ókinishke qaraı, spıkerdiń bir sózi reglamentten tys aıtyldy. Alańymyzǵa saıası taqyryptyń kiristirilgenine qapalandyq. Bul BE WOMAN ASIA qundylyǵyna ári jobanyń mıssııasyna saı kelmeıdi. Biz qarapaıym ári naqty erejeni ustanamyz: forýmdy saıasılandyrýǵa qarsymyz. Biz bir-birine qurmetpen qaraýdy, ózara yntymaqtastyqty jáne dıalogty qoldaımyz», dedi komıtet ókilderi.
Uıymdastyrýshylar moderasııany kúsheıtip, reglamentti qatań qadaǵalaýǵa jáne spıkerlermen túsindirý jumystaryn arttyrýǵa ýáde berdi.Sonymen qatar, uıymdastyrý komıteti jeke adamnyń aıtqan pikirin búkil forýmǵa, qatysýshylarǵa nemese seriktesterge telimeýdi surady.