Mádenıet jáne aqparat mınıstrliginiń qoldaýymen Roza Baǵlanova atyndaǵy «Qazaqkonsert» memlekettik akademııalyq konserttik uıymy elorda qonaqtary men turǵyndaryn «Kóshpendiler áýeni» II halyqaralyq etnıkalyq mýzyka festıvaline shaqyrady, dep habarlaıdy Egemen.kz.
Jobanyń maqsaty – birtutas shyǵarmashylyq orta qurý, tarıhy tereńge jaıylǵan óner, ejelgi salt-dástúr arqyly túrki halyqtarynyń birligi men rýhanııatyn ulyqtaýǵa baǵyttalǵan túrki mádenıetin dáripteý. Festıval úzdik ónerpazdar tájirıbe almasyp, urpaqtar sabaqtastyǵyn nasıhattaıtyn alańǵa aınalady. Sonymen qatar, jas oryndaýshylardyń kórkemdik talǵamyn tárbıeleýge jáne olardy úzdik mádenı qundylyqtarǵa baýlýǵa baǵyttalǵan.
Konserttik baǵdarlamada kórermender folklorlyq dástúrlermen tyǵyz baılanysty, túrki áleminiń mýzykalyq murasyn jańa qyrynan tanytatyn oryndaýshylardyń ónerin tamashalaıdy. Sondaı-aq, dala áýenderiniń baıyrǵy úlgileri men halyq ánderiniń zamanaýı óńdelgen nusqalary, ulttyq aspaptarǵa arnalǵan týyndylar men oryndaýshylyqtyń tyń formalary usynylady.
Festıval 18-19 qazan kúnderi saǵat 18:00-de Roza Baǵlanova atyndaǵy «Qazaqkonsertte» ótedi. Alǵashqy kúni sahnaǵa shyǵatyn sheteldik ónerpazdar: Reseı Federasııasynan «Namǵar» toby (Býrıatııa), Zakır Dúıshenbek (Qyrǵyzstan) jáne Jánibek Pııazov (Qaraqalpaqstan). Sondaı-aq, qazaqstandyq óner ujymdary men talantty oryndaýshylary da óz ónerlerin ortaǵa salady. Atap aıtqanda, «Astana sazy» qazaq memlekettik folklorlyq ansambli, «Joshy» ansambli, «Satzhan Project» toby, Edil Qusaıynov, Qazybek Ádikeı, Amanjol Nyǵmet, Sandjaı Almıshev jáne Aıhat Qazıhan.
Festıvaldiń ekinshi kúni sahnaǵa shyǵatyn sheteldik ónerpazdar: Arslanbek Sýltanbekov (Túrkııa), «Zafar» toby (Ázerbaıjan), Reseı Federasııasynan Erkın Alekseev (Saha Respýblıkasy) jáne Azat Bıkchýrın (Bashqurtstan). Sondaı-aq, «Qorqyt» etno-folklorlyq ansambli, «Túrkistan» kameralyq ansambli, Edil Qusaıynov jáne Saltanat Ersultan.
2023 jyly alǵash ret ótken «Kóshpendiler áýeni» halyqaralyq etnıkalyq mýzyka festıvaline Iаkýtııa, О́zbekstan, Qyrǵyz Respýblıkasy, Túrkııa jáne Majarstan elderiniń ónerpazdary qatysqan bolatyn.