Kópshilik chekterdi qaǵaz sııaqty makýlatýraǵa ótkizýge bolady dep oılaıdy. Biraq ekologtardyń aıtýynsha, kassalyq chekter – erekshe óńdeýdi qajet etetin qaldyqtar, sondyqtan olardy qaıta óńdeýge jiberýge bolmaıdy.
Ekolog Aıjan Skaqovanyń túsindirýinshe, chekter arnaıy termoplenkamen qaptalǵan qaǵazdan jasalady. Ol qyzǵan kezde mátindi shyǵaratyn hımııalyq qospalardan turady.
«Bul zattar ýaqyt óte kele topyraqqa, sýǵa jáne ekojúıege túsýi múmkin. Sondyqtan mundaı qaǵazdy makýlatýramen aralastyrýǵa bolmaıdy. Olar jeke joıylýy tıis, áıtpese tabıǵatqa zııan keledi», deıdi maman.
Qazir elimizde qaldyqtardy bólek jınaý júıesi endi ǵana damyp keledi, sondyqtan chekterdi qabyldaıtyn arnaıy pýnktter joq.
«Ázirge chekterdi kádimgi turmystyq qatty qaldyqtarǵa arnalǵan konteınerge tastaǵan jón. Bizde áli qaldyqtardy suryptaý deńgeıi tómen. Kópshilik batareıkany da bólek ótkizbeıdi», dedi Aıjan Skaqova.
Onyń aıtýynsha, ekologııalyq mádenıetti qalyptastyrý úshin kúndelikti ádetterden bastaý kerek. Qaldyqtardy suryptaý mádenıetin damytý men halyqty aqparattandyrý – ekologııany qorǵaýdyń eń tıimdi joldarynyń biri.