Almaty oblysynda myń túıeden quralǵan kerýen resmı túrde Gınnes rekordtar kitabyna endi. Bul týraly shara barysynda kitap ókilderi málimdedi, dep jazady Egemen.kz.
Bıylǵy 20 qyrkúıekte Ile aýdanyna qarasty Qurty aýylynda myń bir túıeden quralǵan kerýen bir shaqyrym jol júrip ótti. Osy jetistik Gınnes rekordtar kitabyna álemdegi eń úlken túıe kerýeni retinde tirkeldi.
Sertıfıkatty Gınnes rekordtar kitabynyń ókili Rıchard-Ýılıam Stennıng tabystap, Qazaqstandaǵy bul oqıǵanyń ózgelerden ereksheligin atap ótti.
«Bul – erekshe jaǵdaı. Basqa elderde mundaı kerýender ádette túrli ıelerdiń janýarlarynan quralady: bireýde tórt túıe, ekinshisinde eki túıe bolýy múmkin. Al munda búkil kerýen bir adamnyń ıeliginde. Bul rekordty shyn máninde biregeı etedi. Qazaqstan meni qatty áserge bóledi. Endi men munda tek jumyspen emes, týrıst retinde de qaıta oralǵym keledi», – dedi ol.
Almaty oblysynyń ákimi Marat Sultanǵazıev bul jetistik tek óńir úshin emes, búkil el úshin mańyzdy oqıǵa ekenin atap ótti.
«Rekordtyń rastalýy – bizdiń mádenı muramyz ben ulttyq rýhymyzdyń moıyndalýy. Myń túıeden quralǵan kerýen halyqty biriktirip, qazaq halqynyń dástúrlerine degen qurmettiń sımvolyna aınaldy», – dedi óńir basshysy.
Kerýenniń ıesi ári bastamashysy, «Daýlet-Beket» JShS dırektory Sydyq Daýletov jobany daıyndaýǵa shamamen alty aı ýaqyt ketkenin aıtty.
«Túıeler erkindikti jaqsy kóredi, olardy bir jerge jınaý ońaı bolǵan joq. Degenmen maqsat pen senim bolsa, kez kelgen istiń oryndalatynyn dáleldedik. Aldaǵy ýaqytta shubat festıvalin ótkizýdi josparlap otyrmyz — halqymyzǵa osyndaı dástúrimizdi jandandyratyn sharalar jetispeıdi», – dedi ol.