Sottalǵan adamdar da – qoǵam múshesi, ýaqytsha shektelgenimen olardyń da quqy saqtalady. Onyń ústine arasynda qylmys álemine kezdeısoq qosylyp ketkenderi de bar. Sondyqtan qoǵam olardyń da quqyǵyn qorǵaýy kerek.
Eki jyl buryn azaptaý men qorlaýdyń basqa da túrlerin joıýǵa, osy másele boıynsha halyqaralyq normalardy ulttyq zańnamaǵa engizýge, sondaı-aq sottalǵandardyń quqyǵyn keńeıtip, túrmedegi teris sýbmádenıettiń qalyptasýyna jol bermeýge baǵyttalǵan zań qabyldandy. Zańnamalyq aktilerge engizilgen ózgerister adam quqyqtaryn saqtaýǵa beriletin kepildikterdi arttyrady. Sottalǵandardyń túzelýine, qoǵamǵa beıimdelýine múmkindik jasaý arqyly olardyń túrmedegi jaǵdaıyn jaqsartýdy kózdeıdi. Túrmede jumysshy mamandyqtaryn meńgerý de qarastyrylǵan. Dánekerleýshi, tokar, slesar, betonshy, kranshy, t.b. mamandyqtardy alý sottalýshynyń ómirge degen qushtarlyǵyn arttyrady.
Jýyrda Soltústik óńirdiń Kásipkerler palatasy men Qylmystyq atqarý júıesi departamenti yntymaqtastyq týraly memorandýmǵa qol qoıdy. Bul qujat boıynsha oblys aýmaǵyndaǵy №48, №50 túzetý mekemelerindegi jazasyn óteýshiler arasynda jumysshy mamandyǵyna oqytý jáne tájirıbelik sabaqtar baǵdarlamasyn iske asyrýdy qamtıdy. Bastamanyń negizgi maqsaty – sottalǵan adamdardyń kásiptik mamandyq alýyna múmkindik berý. Al mamandyǵy bar adam erteń bostandyqqa shyqqanda qoǵam ómirine erkin aralasyp, ózine ońaı jumys ta tabady.
Kásipkerlerdiń soltústik-qazaqstandyq palatasynyń dırektory Esjan Orazalınniń aıtýyna qaraǵanda, bul qujat tájirıbelik qana emes, áleýmettik mańyzǵa ıe.
«Biz birlesip jumys istesek, mamandyq alýǵa umtylǵan sottalǵan adamdardyń kásibı turǵydan ósip, sheberligin shyńdaýyna múmkindik bar. Osynyń arqasynda olardyń qoǵammen jyldam aralasyp ketýine ońtaıly jaǵdaı týady», dedi.
Kásipkerler palatasy túzetý mekemelerinde osy zamanǵy kásibı jumysshylardy oqytyp, daıarlaý mindetin óz moınyna alady. Al qylmystyq-atqarý júıesi oqý úıretý jumysyna óz alańyn usynady. Oblystyq qylmystyq-atqarý júıesi departamentiniń orynbasary Qanat Esenov bul sharanyń sottalýshylardy jańa ómirge yntalandyrýda mańyzy baryn atap ótti.
«Eger azamat túzetý ornynan mamandyq alyp shyqsa, ol qoǵam ómirinde belsendiligi artyp, jumys ornyn tabýyna múmkindigi bar. Kez kelgen jumys orny qazir adamnyń kásibıligine qaraıdy. Jumys berýshiler kósheden kelgen kezdeısoq adamdy jumysqa almaıdy, al jumysshy kásibi týraly kýáligi bolsa, ondaı adamnyń jumysqa turý múmkindigi joǵary», dedi ol.
Munda jumysshy kásibi ǵana emes, kásipkerlik pen qarjylyq saýat týraly da oqytylady. Alǵashqy kezekte oqýmen 120 adam qamtylady, odan ári taǵy 200 adam kýrstardan ótpek.
Soltústik Qazaqstan oblysy