Búgin Almaty ákimi Darhan Satybaldy «Almaty Tazalyq» memlekettik kommýnaldyq kásipornyna baryp, qyzmetkerlerdiń eńbek jaǵdaıymen, kommýnaldyq tehnıka parkiniń jańǵyrtylý barysymen jáne qysqy maýsym aldyndaǵy qala tazalyǵyn qamtamasyz etý jumystarynyń uıymdastyrylýyn qarap shyqty. Dál osy kúnderi «Almaty Tazalyq» qyzmetkerleriniń sany eki ese kóbeıip, jalaqysy 55%-ǵa deıin ósti, dep habarlaıdy Egemen.kz.
Darhan Satybaldy kommýnaldyq qyzmetterdiń tıimdi ári úzdiksiz jumysy eń aldymen qyzmetkerlerge jasalǵan jaǵdaıǵa tikeleı baılanysty ekenin aıtady. Ákimniń tapsyrmasymen bıyl kásiporynnyń eńbekaqy qory edáýir ulǵaıyp, nátıjesinde jol jumysshylarynyń, júrgizýshiler men mehanızatorlardyń jalaqysy 30–55%-ǵa ósti.
Sonymen qatar, kásiporyn qyzmetkerleriniń jalpy sany 1560-tan 3169 adamǵa deıin artty. Onyń ishinde 1362 jol jumysshysy, 136 júrgizýshi jáne 84 mehanızator qabyldandy. Osylaısha jol jumysshylarynyń shtattyq sany 638-den 2000 adamǵa deıin kóbeıip, úsh aýysymdyq jumys kestesine kóshýge jáne kóshe-jol jelisin tazalaý tıimdiligin arttyrýǵa múmkindik týdy.
Eńbekaqyny kóterýmen qatar, qyzmetkerlerdiń turmys jaǵdaıyn jaqsartýǵa baǵyttalǵan baǵdarlama iske asyrylyp jatyr. Demeýshilik qarajat esebinen árqaısysy 12 adamǵa arnalǵan eki modýldik turǵyn blok satyp alyndy. Jyl sońyna deıin syıymdylyǵy 60 oryndyq taǵy 10 blok alý josparlanyp otyr. Sonymen birge 28 oryndyq modýldik jataqhana ornatý máselesi qarastyrylyp, Lomonosov kóshesi, 23 mekenjaıynda 100 oryndyq jataqhananyń qurylysy júrgizilýde.
Qysqy maýsymda qyzmetkerlerdiń jaıly turýyn qamtamasyz etý úshin qala turǵyn úı qorynan ýaqytsha eki úı bólinedi – árqaısysy 50 orynnan Naýryzbaı jáne Túrksib aýdandarynda. Kelesi jyly kommýnaldyq kásiporyn qyzmetkerleri úshin qosymsha 272 tósek-orynmen qamtamasyz etý kózdelgen.
«Kommýnaldyq qyzmet mamandarynyń jalaqysyn arttyrý men olarǵa laıyqty jaǵdaı jasaý – qalanyń turaqty jumys isteýiniń mańyzdy bóligi, ásirese qysqy kezeńde. Tek eńbekaqymen shektelmeı, demalysqa da tolyq jaǵdaı jasaý qajet. Mysaly, demalys bólmeleri, as úı, kir jýý jáne jýyný bólmeleri bolýǵa tıis. Sonymen qatar, kelesi jyly qyzmetkerlerge arnalǵan jataqhanalar sany 400 orynǵa deıin ulǵaıtylýy kerek», dedi Darhan Satybaldy.