Keshe Astana qalasyndaǵy «Kinopark 7 IMAX Keruen» kınoteatrynda Mádenıet jáne aqparat mınıstrliginiń qoldaýymen «Sháken Aımanov atyndaǵy «Qazaqfılm» kınostýdııasy men Ulttyq kınony qoldaý memlekettik ortalyǵy birlesip túsirgen «Kapıtan Baıtasov» atty kórkem fılmniń tusaýkeseri ótti.
Respýblıka kúni qarsańynda ótken fılmniń tusaýkeserine Mádenıet jáne aqparat mınıstri Aıda Balaeva, Parlament depýtattary, quqyq qorǵaý organdarynyń ókilderi, mádenıet qaıratkerleri, akterler men týyndynyń shyǵarmashylyq toby, sondaı-aq batyrdyń otbasy – jubaıy Gúljamal Tajıeva men uly Armanjan qatysty.
Kınonyń kórsetilimi aldynda Parlament Senatynyń depýtaty Nurtóre Júsip Senat Tóraǵasy Máýlen Áshimbaevtyń quttyqtaý hatyn oqyp berdi.
«Memleket basshysy Qasym-Jomart Toqaev bıyl quqyq qorǵaý organdarynyń keńeıtilgen alqa májilisinde erjúrek saqshylardyń erligi halyqqa janqııarlyqpen qyzmet etýdiń úlgisi retinde jurtymyzdyń jadynda saqtalýǵa tıis ekenin aıtty. Osy turǵydan kelgende, qalyń kórermenge jol tartqan jańa fılmdi bul baǵyttaǵy irgeli isterdiń jarqyn kórinisi dep qabyldaımyz. Ǵazız Baıtasov – qysqa ǵumyrynda qylmysqa qarsy kúresti qasterli paryz sanap, Otanǵa adal qyzmet etýdiń ozyq úlgisin kórsetti», delingen quttyqtaý hatta.
Mádenıet jáne aqparat mınıstri Aıda Balaeva tusaýkeserde elimiz úshin eń mańyzdy mereke aıasynda osyndaı ıgi shara ótýiniń ózindik sımvoldyq máni bar ekenine toqtalyp, barsha halqymyz úshin egemendigimiz ben táýelsizdigimizden asqan qundylyq joq ekenin tilge tıek etti. Sondaı-aq táýelsizdigimizdi nyǵaıtý, eldigimizdi saqtaý bárimizge ortaq qasterli paryz ekenine toqtaldy.
«Memleketimizdiń damýy – el azamattarynyń jigerli eńbeginiń, adaldyǵy men otansúıgishtiginiń jemisi dep bilemiz. Osy turǵyda el qaýipsizdigin qamtamasyz etip, qoǵamdyq tártip pen azamattardyń tynyshtyǵyn saqtap júrgen quqyq qorǵaý salasy ókilderiniń qyzmeti aıryqsha qurmetke laıyq. Olar elimizdiń turaqtylyǵy men tynyshtyǵy jolynda jaýapty mindetterdi abyroımen atqaryp keledi», dedi sózinde.
Sondaı-aq mınıstr mundaı jobalardy qoldaý – ulttyq kınony damytý ǵana emes, sonymen birge jas urpaqtyń boıyna erlik, ádildik, adaldyq sııaqty qundylyqtardy darytýdyń mańyzdy quraly ekenin atap ótti.
«Kapıtan Baıtasovtyń janqııarlyq qyzmeti – naǵyz patrıotızmniń úlgisi. Fılm tek erlik týraly emes, ar-namys pen borysh aldyndaǵy adaldyq jaıynda da tereń oıǵa jeteleıdi. Memleketimizdiń tynyshtyǵy men qaýipsizdigi – eldegi ár azamattyń ortaq jaýapkershiligi.
Prezıdentimiz atap ótken «Zań men tártip», «Adal azamat» qaǵıdattary osy fılmde kórinis tapqan erlik pen elge adaldyq syndy qundylyqtarmen úndesip jatyr. О́ıtkeni memlekettiń qýaty – zań men tártipte, al ulttyń beriktigi – azamattarymyzdyń adaldyǵy men jaýapkershiliginde ekeni sózsiz», dedi mınıstr.
Aıda Balaeva fılmdi túsirýge atsalysqan barlyq shyǵarmashylyq ujymǵa, atap aıtqanda fılm rejısseri ári ssenarıı avtory Daýren Qamshybaevqa, jáne basty rólderdi somdaǵan Azamat Satybaldy, Erkebulan Daıyrov, Asan Májıt, Darhan Súleımenov, Qobylandy Bolat jáne Samal Eslıamovaǵa zor rızashylyǵyn bildirdi.
«Biz osyndaı týyndylar arqyly ótkenimizdi umytpaı, bolashaǵymyzǵa senimmen qaraımyz. Bul fılm árqaısymyzǵa oı salyp, ultjandylyq pen azamattyq jaýapkershiliktiń mańyzyn uǵynýǵa shaqyrady. Týyndy ár júrekke úmit pen jiger syılap, jas urpaqqa shabyt beredi dep senemin! », dep túıindedi sózin.
«Kapıtan Baıtasov» fılminiń sıýjeti 2011 jyldyń 12 qarashasynda Taraz qalasynda bolǵan shynaıy oqıǵaǵa negizdelgen. Sol kúni polısııa kapıtany Ǵazız Baıtasov óz ómirin qıyp, terrorısti toqtatyp, beıbit turǵyndardyń ómirin saqtap qalǵan edi. Polıseıdiń bul erligi batyrlyqtyń, patrıotızm men adaldyqtyń sımvolyna aınaldy. Atalǵan týyndyny kórermender 23 qazannan bastap elimizdiń barlyq kınoteatrynda kóre alady.