Astanadaǵy Kúlásh Baıseıitova atyndaǵy Qazaq ulttyq óner ýnıversıtetinde Respýblıka kúnine oraı mádenıet jáne aqparat salasynyń qyzmetkerlerin marapattaý rásimi ótti. Memleket basshysy Qasym-Jomart Toqaevtyń Jarlyǵymen taǵaıyndalǵan memlekettik nagradalardy otandyq mádenıet, óner jáne medıa salasynyń damýyna eleýli úles qosqan 62 qyzmetkerge Mádenıet jáne aqparat mınıstri Aıda Balaeva tabystady.
Is-shara barysynda mınıstr Memleket basshysy Respýblıka kúni qarsańynda bir top azamatty memlekettik nagradamen marapattaý týraly Jarlyqqa qol qoıǵanyn atap ótti. Olardyń qatarynda halyqpen etene jumys istep júrgen qarapaıym eńbek adamdary da bar. Sonyń ishinde Aqparat, mádenıet, óner salalarynda qajyrly eńbegimen tanylǵan mamandar da qurmetke bólendi.
Marapat ıeleriniń qatarynda «Astana Opera» memlekettik opera jáne balet teatrynyń, K.Baıseıitova atyndaǵy Qazaq ulttyq óner ýnıversıtetiniń, E.Rahmadıev atyndaǵy memlekettik akademııalyq fılarmonııanyń, R.Baǵlanova atyndaǵy «Qazaqkonsert» memlekettik konserttik uıymynyń jáne basqa da mádenıet mekemeleriniń qyzmetkerleri bar.
Sonymen qatar «Egemen Qazaqstan» jáne «Kazahstanskaıa pravda» gazetteriniń, «Habar» agenttigi men «Qazaqstan» telearnasynyń, respýblıkalyq Ulttyq akademııalyq kitaphana jáne basqa da uıymdardyń qyzmetkerleri eleýsiz qalmady. Olardyń qatarynda áriptesimiz, kóp jyldan beri bas basylymda eseli eńbek sińirgen Qonysbaı Shejimbaıǵa «Eren eńbegi úshin» medali tapsyryldy. Sondaı-aq «Kazahstanskaıa pravda» gazetiniń fototilshisi Igor Býrgandınov pen ekonomıka bóliminiń redaktory Iýrıı Fomenko «Qurmet» ordeniniń ıegeri atandy.
Saltanatty rásimniń sońynda elimizdiń jetekshi shyǵarmashylyq ujymdary ónerpazdarynyń qatysýymen konsert uıymdastyryldy.