Franceinfo habarlaýynsha, Parıjdegi áıgili Lývr mýzeıinde buryn-sońdy bolmaǵan urlyq jasaldy. Jeksenbi kúni tańerteń mýzeı ashyla salysymen ishine belgisiz adamdar kirip, erekshe qundylyǵy bar tarıhı áshekeı buıymdardy alyp ketken. Sol kúnniń ózinde mýzeıdi tolyq jaýyp, tergeý jumystary bastalyp ketti, dep jazady Egemen.kz.
Urylar mýzeıge qalaı kirdi?
Mýzeı jylyna toǵyz mıllıonǵa jýyq adam qabyldaıdy. Osyndaı úlken ári qaýipsizdik deńgeıi joǵary nysanda mundaı oqıǵanyń bolýy kópshilikti tańǵaldyrdy. Bul oqıǵa 19 qazan kúni tańerteń, mýzeı esigi ashylǵan sátte oryn alǵan. Qala turǵyny motosıkl shlemin taqqan kúdikti adamdardy kórip, dereý habarlaǵan. Shamamen saǵat 9:30 shamasynda olar Lývrǵa kiredi. Mádenıet mınıstri Rashıda Datı sol kúni tańerteń bul jaıt týraly jeli arqyly habar taratty. Onyń aıtýynsha, adam zardap shekpegen.
Mınıstr Loran Nýnes túsindirgendeı, qylmyskerler Fransýa Mıtteran jaǵalaýyndaǵy Apollon galereıasynyń terezesin jaryp kirgen. Olar terezeni kesý úshin arnaıy qural qoldanǵan. Oqıǵanyń ózi bar bolǵany jeti mınýtqa sozylǵan. Urylar júk kóteretin tehnıkany paıdalanyp terezege kóterilgen. Keıin skýterge otyryp qashyp ketken. Al kótergish turǵan fýrgon sol jerde qaldyrylǵan. Tergeý tobynyń aıtýynsha, bul aldyn ala zerttelip daıyndalǵan qylmys.
Franceinfo deregine qaraǵanda, bastapqyda tórt adam kelgen. Eki adam júk kótergishte bolǵan, ekeýi skýtermen júrgen. Olar qaýipsizdik aımaǵyn belgileý úshin konýstar qoıǵan. Terezeni kesip, ishke ótip, eki vıtrınany syndyrǵan. Kúzetshige qoqan loqy jasalǵan. Murajaı qyzmetkerleri qaýipsiz jerge baryp, saǵat 9:37-de sıgnalızasııa qosylǵan. Bir mınýttan keıin urylar oqıǵa ornynan skýtermen jasyrynǵan.
Ne urlandy?
Fransııanyń Mádenıet mınıstrligi men Ishki ister mınıstrliginiń aıtýynsha, 8 tarıhı asyl buıym joǵalǵan. Bul buıymdardyń arasynda Parıj saraılaryna tıesili kóne tájder, asyl tastarmen áshekeılengen alqalar men syrǵalar bar. Apollon galereıasynda saqtalǵan bul buıymdar erekshe qundy. Urylar alyp ketken asyl buıymdar arasynan bir táj keıin mýzeıge jaqyn mańnan tabylǵan. Onyń ústinde 1354 brıllıant jáne 56 ızýmrýd bar ekeni jazylǵan.
«Biz tórt adamnyń qylmys jasaǵanyn anyq kórip otyrmyz. Olar kótergish platformany terezege jaqyndatyp, kesip kirgen. Bizde kamera jazbalary bar. Olar bul oqıǵany muqııat josparlaǵan. Kimniń artynda turǵany týraly naqty nusqa joq. Tipti esirtki bıznesine qatysy bar top bolýy da múmkin. Biz eshbir nusqany joqqa shyǵarmaımyz», dedi Parıj prokýrory Lora Bekko.
Tonaýshy top torǵa tústi
Parıj prokýrory Lora Bekko Lývr mýzeıindegi urlyq isine baılanysty tergeý barysy týraly málimdeme jasady. Onyń aıtýynsha, bul qylmys aldyn ala oılastyrylǵanymen, ony uıymdastyrǵandar joǵary deńgeıdegi uıymdasqan qylmystyq top emes. Bul týraly «Evropeıskaıa pravda» basylymy jazdy.
Lora Bekko qazirgi ýaqytta anyqtalǵan derekter kúdiktilerdiń kásibı qylmystyq toptarǵa tán belgileri joq ekenin kórsetetinin atap ótti.
«Bul is erekshe bolǵanymen, kúdiktiler kúrdeli operasııalar jasaıtyn uıymdasqan qylmystyq toptyń músheleri emes. Tergeý barysynda tórt kúdiktiniń de, sonymen qatar olardyń birimen jaqyn baılanysta bolǵan adamnyń da kásibı qylmyskerlerge tán sıpattary anyqtalmady», dedi ol.
Prokýror kúdiktilerdiń jergilikti turǵyndar ekenin aıtty. Onyń boljamyna sáıkes, olar Parıjdiń soltústigindegi Sena Sen Denı aýdanynan bolýy múmkin. Bul aýdan áleýmettik jaǵdaıy tómen aımaq retinde belgili.
Qazirgi ýaqytta tórt kúdiktiniń úsheýi ustaldy. Prokýror Lora Bekko kem degende bir adamnyń áli bostandyqta júrgenin rastady. Sonymen qatar ol basqa qatysýshylardyń bolýy múmkin ekenin joqqa shyǵarmady.