Memleket basshysynyń tapsyrmasyna sáıkes Qazaqstan men Serbııanyń bas shaharlary arasynda tikeleı áýe qatynasy iske qosyldy, oǵan Qasym-Jomart Toqaevtyń Serbııaǵa sapary kezinde qol jetkizildi. Joba elimizdiń Syrtqy ister mınıstrligi men Serbııadaǵy Qazaqstan elshiliginiń qoldaýymen múmkin boldy, dep jazady Egemen.kz.
Ashylý saltanatyna Kólik vıse-mınıstri Talǵat Lastaev, SCAT áýe kompanııasynyń prezıdenti Vladımır Denısov, Serbııanyń Qazaqstandaǵy Tótenshe jáne О́kiletti elshisi Vladımır Iovchıch jáne N.Nazarbaev atyndaǵy halyqaralyq áýejaı basqarma tóraǵasynyń birinshi orynbasary Rýslan Pyshtanov qatysty.
Atalǵan eldiń bas shahary Belgradqa kelgennen keıin Qazaqstan delegasııasyn Serbııa Prezıdenti Aleksandr Výchıchtiń tapsyrmasymen Serbııa Ulttyq jınalysynyń spıkeri Ana Brnabıch jáne Kólik mınıstriniń orynbasary Verıka Echmenısa qarsy aldy.
«Astana men Belgrad arasyndaǵy tikeleı reısterdiń ashylýy Qazaqstan men Serbııa arasyndaǵy baılanysty nyǵaıtýdaǵy mańyzdy qadam bolyp tabylady. Jańa baǵyt eki el arasyndaǵy bıznes, týrızm jáne mádenı yntymaqtastyq úshin jańa jol ashady», dep atap ótti Kólik vıse-mınıstri Talǵat Lastaev.
Kólik mınıstrliginiń málimetinshe, Qazaqstan men Serbııa arasynda vızasyz rejım qoldanylady. Ushý uzaqtyǵy 5 saǵat 40 mınýt. Bul baǵyt boıynsha jolaýshylar tarapynan joǵary suranys kútilip otyr. Alǵashqy reıste 92 jolaýshy bolǵan.
Astana-Belgrad-Astana reısteri aptasyna eki ret (dúısenbi jáne beısenbi) zamanaýı Boeing 737 ushaqtarymen oryndalady.