«Qazaqmys» óndiristegi qaýipsizdik deńgeıin kóterý maqsatynda AQSh-tyń «JMJ Associates» halyqaralyq konsaltıngtik kompanııasymen kelisimshart jasasty. Kompanııa barlyq óndiris ornynda ónerkásiptik qaýipsizdik pen eńbekti qorǵaý júıesine strategııalyq aýdıt júrgizedi. «Qazaqmys korporasııasy» basqarma tóraǵasy Nurahmet Nýrıev «JMJ» ókilderimen kezdesip, birlesken jumysty talqylady.
«JMJ Associates» – qaýipsizdik mádenıetin damytýǵa ári kóshbasshylardyń rólin kúsheıtýge mamandanǵan kompanııa. Birlesken jobanyń maqsaty – «Qazaqmystyń» barlyq kásiporynynda adamnyń ómiri men densaýlyǵy árbir qyzmetkerdiń jeke qundylyǵyna aınalatyn turaqty qaýipsizdik mádenıetin qalyptastyrý.
«Biz bul aýdıtti tek rásimdik tekseris dep emes, kompanııa bolashaǵynyń qaýipsizdigi men turaqtylyǵyna jasalǵan strategııalyq ınvestısııa dep qarastyramyz», dedi Nurahmet Nýrıev.
Elimizdegi «JMJ» bólimshesiniń jetekshisi Renat Sálimǵalıevtiń sózinshe, jumys dıagnostıkadan bastalady. Suhbat alynyp, óndiriste baqylaý júrgiziledi, úderisterge taldaý jasalady. Bul júıeniń artyqshylyǵy men jetildirýdi qajet etetin baǵyttaryn anyqtaýǵa múmkindik beredi.
Joba eki baǵytta iske asady. Birinshi baǵyt – qyzmetkerlerdiń qaýipsizdikke degen jeke jaýapkershiligin qalyptastyrý. Basshylar jaqsy úlgi kórsetedi. Ujymda senim men ashyqtyq ornaıdy. Ekinshi baǵyt – qaýipsiz eńbek ortasyn qurý. Táýekelder azaıyp, qaýipsizdik erejelerin saqtaý kúndelikti jumys daǵdysyna aınalady.
«Joba birneshe jylǵa josparlanǵan. Biz barlyq deńgeıdegi qyzmetkerlerdi oqytamyz, ishki kóshbasshylar men qaýipsizdik ambassadorlaryn daıarlaımyz. Maqsatymyz – joba aıaqtalǵannan keıin de kompanııa ishinde qaýipsizdik mádenıetin damytý», dedi Renat Sálimǵalıev.
«JMJ» kompanııasyn osy yntymaqtastyq arqyly qyzmetkerler men basshylyq arasyndaǵy senimdi nyǵaıtyp, jaraqat alý men oqys oqıǵalardyń sany azaıyp, al qaýipsizdik kúndelikti jumystyń qalypty bóligine aınalatynyna senedi.
Nurahmet Nýrıevtiń aıtýynsha, jobaǵa qatardaǵy basshydan bastap, joǵary menedjmentke deıingi basqarýdyń barlyq deńgeıi qatysady. Aýdıt qorytyndysynda 2028–2029 jyldarǵa deıingi qaýipsizdik júıesin jetildirýge arnalǵan uzaqmerzimdi baǵdarlama ázirlenedi. Maqsat – ereje saqtaýdy avtokólikte qaýipsizdik beldigin taǵý sııaqty ádetke aınaldyrý.