Qazaqstan bankterindegi zańdy tulǵalardyń depozıtteri 19,2 trln teńgege jetti – bul bir aıda +3,3%, al bir jylda +17,9% ósim. Bıznestiń barlyq depozıtteriniń 87%-dan astamy sektordaǵy alǵashqy top-10 ekinshi deńgeıli bankke tıesili. Zańdy tulǵalardyń depozıtteriniń jalpy depozıtter kólemindegi úlesi 42,1%, ıaǵnı sońǵy úsh jyl qatarynan 41-43% deńgeıinde saqtalyp otyr, dep habarlaıdy Egemen.kz.
Kóshbasshylar men trendter
Eń iri bankter arasyndaǵy aılyq ósim boıynsha absolıýtti kóshbasshy – Bank RBK: +12,5%, jalpy kólemi 956,2 mlrd teńge. Salystyrý úshin, úzdik on banktiń ortasha aılyq ósimi nebári 2,9% bolǵan.
Jyldyq ósim dınamıkasy boıynsha da Bank RBK birinshi orynda – +41,7%, al top-10 bank boıynsha ortasha ósim 16,1% deńgeıinde. Bul kórsetkish kásipkerlerdiń atalǵan qarjy ınstıtýtyna degen seniminiń artqanyn jáne bank dınamıkasynyń turaqty oń trend ekenin kórsetedi.
Aıt aketelik, Bank RBK jeke tulǵalardyń depozıtter portfelin bir jylda 12,4%-ǵa ulǵaıtyp, 608 mlrd teńgege jetkizgen. Al banktiń jalpy depozıttik portfeli (jeke jáne korporatıvtik) 28,7%-ǵa ósip, 1,6 trln teńgege jetken – bul da sektordaǵy eń joǵary kórsetkishterdiń biri.
Aılyq ósim boıynsha ekinshi orynda – ForteBank (+11,2%, jyldyq ósim – +23,1%). Úzdik úshtikti Citibank Kazakhstan túıindedi: aılyq ósim +7,9%, alaıda jyldyq kórsetkish –5,8% tómendegen. Tórtinshi jáne besinshi oryndarda Alatau City Bank (+7,3%) jáne Halyk Bank (+5,7%) ornalasqan. Jalpy, úzdik on banktiń ishinde jeti bank aılyq ósim kórsetken.
Bıznestiń depozıt túrleri
Qazaqstan bankterindegi bıznes depozıtterine aǵymdaǵy shottar, merzimdi jáne jınaq salymdary, sondaı-aq zańmen belgilengen shartty depozıtter (mysaly, jer qoınaýyn paıdalanýshylardyń arnaıy shottary jáne t.b.) kiredi. Mundaı ónimderdiń barlyǵy eldegi iri bankterdiń depozıttik jelisinde usynylady.
Erekshe ónimder
Keıbir qarjy ınstıtýttary bıznestiń ótimdiligin arttyrý úshin erekshe ónimder usynady. Solardyń biri – overnaıt-depozıt, ıaǵnı bar bolǵany bir táýlikke qarajat ornalastyrý arqyly tabys tabýǵa múmkindik beretin qysqa merzimdi depozıt. Mundaı ónimdi, atap aıtqanda, ósim boıynsha salalyq kóshbasshy Bank RBK usynady.