Pavlodarda KSRO sport sheberi, qurmetti sport qaıratkeri Amangeldi Aımaǵambetovtiń qurmetine jasóspirimder arasynda ashyq birinshilik ótti. Bıyl jıyrmasynshy márte uıymdastyrylǵan básekege 200-den astam jas balýan qatysty. Ataýly saıysty respýblıkalyq jarystar aldyndaǵy irikteý týrnıri deýge bolady.
Amangeldi aqsaqal – ańyzǵa aınalǵan tulǵa. Bıyl 85 jasqa aıaq basqan ardager keńes ókimeti tusynda erkin kúrestiń sheberi atanyp, talaı márte baıraqty dodalarda top jarǵan. Sportshy ákesinen erte aıyrylǵan. Ákesi 1937 jyly «halyq jaýy» degen jalamen ustalyp ketken soń, balalar úıinde tárbıelenedi. Onda ózi qatarlas balalarmen julysyp júrip, kúrestiń negizgi tásilderin alǵashqy muǵalimderinen úırene bastaıdy. Keıin Pavlodar qalasyna kelip, joǵary sporttyq bilim alady. Sporttaǵy órleý jolyn oblysta bastaǵan aǵamyz sheberliginiń arqasynda respýblıkaǵa tanylyp, el sportynyń tarıhynda óshpes iz qaldyrdy. 1959 jyly oblystar arasynda ótken alamanda jartylaı aýyr salmaqta synǵa túsip, fınalda ataqty Ábilseıit Aıhanovpen beldesken. Sol básekede Pavlodar oblysynyń paıdasyna kúmis júldeni oljalaıdy.
– Kezinde «Qaırat» sport qoǵamynyń múshesi bola júrip, jartylaı aýyr salmaqta oblysta birinshi boldym, tyń ólkeleri arasyndaǵy jarysta chempıon atandym. Keıin respýblıkalyq jarystarda jeńis tuǵyrynan kórinip, 1961–1962 jyldary odaqtyq jarystarǵa qatystym. Qazaq jastary arasynda erkin kúresten tuńǵysh sport sheberi ataǵyn aldym. Kóp jyldar shákirt tárbıeleýmen aınalystym. Olardyń arasynda erkin kúresten oblysqa tanymal sportshy Serik Serǵazın, kezinde sport ardagerleri arasynda álem chempıony atanǵan Omar Janarǵalıev, óńirdiń qurmetti bapkeri Orazaly Muhametálinov, Olımpıada júldegeri Dáýlet Shabanbaı, taǵy basqalaryn atap ótýime bolady, – deıdi ardager.
– Erkin kúres bıyldan bastap Ertis-Baıan óńirinde basymdyq berilgen sport túrleri qataryna enip otyr. Endi qarjylandyrý jaǵy ulǵaıady degen senimdemiz. Oblys kóleminde erkin kúrespen shuǵyldanatyn balalar sany 4 myńnyń ústinde. Barlyq aýdan-qalada erkin kúres seksııalary jumys istep tur, – deıdi erkin kúresten oblystyń aǵa bapkeri, jarystyń bas tóreshisi Ermyrza Syzdyqov.
Jalpy, óńirlerdegi sport mektepterinde jattyǵatyndardyń deni aýyl balalary. Mundaı óńirlik ashyq básekeler arqyly jasóspirimderdiń arasynan myqtylary irikteledi. Báseke sońynda Amangeldi aqsaqal týrnır keleshekte respýblıkalyq deńgeıge kóterilse degen tilegin jetkizdi.
PAVLODAR