Memlekettiń jeke sektorǵa yqpaly keıde májbúrli qadamnan týyndaıtyny ár jerde baıqalyp qalady. Halyk Bank basqarma tórǵasy Úmit Shaıahmetovanyń aıtýynsha, memleket jeke sektormen básekelestikke túspeýi kerek, dep habarlaıdy Egemen.kz.
«Memlekettik jáne kvazımemlekettik kompanııalardyń kommersııalyq nesıelendirýge kirip, ekinshi deńgeıli bankter úshin básekeles emes jaǵdaı jasaıtynyn kórip otyrmyz. Sebebi olar memlekettik qarajat esebinen arzan mólsherleme bere alady. Bul rette kvazımemlekettik kompanııalardyń syrtqy jáne ishki qaryzy birneshe ese ósip, shamamen 25 mlrd dollardy quraıdy. Sondyqtan bul jerde osy sátti teńestirý qajet. Qarjylyq qyzmetter, fınteh-baǵyttar, marketpleıster jáne basqa da servıster jeke sektorda qalýy tıis», deıdi Úmit Shaıahmetova.
Al Ulttyq bank basshysy Tımýr Súleımenov Almatydaǵy qarjygerler kongresinde «Báıterek» holdınginiń jobalaryna jeke qarjy ınstıtýttarynyń qatysý múmkindigin zerttep jatqanyn aıtty. Bas bankırdiń aıtýynsha, memlekettik ınvestısııalardyń jeke ınvestısııalardan basym bolýy otandyq ekonomıkanyń básekege qabilettiligine keri áserin tıgizedi. Onyń aıtýynsha, bul – akvazımemlekettik qarjy ınstıtýttary naryqtan jekemenshik ınstıtýttardy yǵystyrmaý úshin qabyldanýy múmkin sharalardyń biri. «Báıterek» taıaý jyldary kásipkerlikti qoldaýǵa, turǵyn úı qurylysyn damytýǵa jáne negizgi ulttyq jáne ınvestısııalyq jobalardy iske asyrýǵa shamamen 8 trln teńge baǵyttaýdy josparlap otyr.