Qazaq Stroy kompanııasynyń negizin qalaýshy ári majorıtarlyq aksıoner Nurlan Artyqbaev «Aqtóbe» fýtbol klýbynyń jańa ınvestory atanbaq, dep habarlaıdy Egemen.kz.
«Aqtóbe» klýbyn jekeshelendirý týraly kelisim jasalǵany belgili boldy. Komandanyń jankúıerleri quramdaǵy ózgerister men fýtbol ınternatynyń ashylý múmkindigi jóninde boljaı bastaǵanymen, bul baǵyttaǵy naqty aqparat ázirge jarııalanǵan joq.
Klýbtyń bolashaǵyna qatysty uıymdastyrýshylyq máseleler men ınvestısııa kólemi 2026 jyldyń qańtarynda talqylanbaq.
Esterińizge sala keteıik, qarasha aıynyń basynda «Aqtóbeni» jeke menshikke berý týraly alǵashqy málimet shyqqan edi. Oblys ákimi Ashat Shaharov sheshim jyl sońyna deıin qabyldanatynyn aıtyp, biraq naqty ınvestordyń kim ekenin jarııalamady.
Basqa klýbtarǵa kimder ıelik etedi?Osylaısha, «Aqtóbe» sońǵy jyldary jeke ıelikke ótken klýbtardyń qataryna qosylyp otyr. Buǵan deıin «Qaısardyń» ınvestory – «TAU Group Ltd» ókili Islamǵalı Qozbaqov, «Qyzyljardyń» jańa ıesi – kásipker Sergeı Kan, al, «Jeńis» klýbynyń ınvestory – kásipker Mıhaıl Lomtadze bolǵany málim boldy.
Aıta keteıik, Nurlan Artyqbaev 2025 jyldyń mamyrynda alǵash ret Forbes Kazakhstan tizimine engen. Ol 228 mln dollarlyq baılyǵymen eldegi eń dáýletti kásipkerleriniń qataryna kirip, reıtıngte 44-orynǵa jaıǵasqan. Qazaq Stroy kompanııasynan bólek, kásipker «Telecom Systems Ltd» kompanııasynyń ıesi. Bul kompanııa «Qazahtelekom» aksııalarynyń shamamen 10 paıyzyna ıe.
Taǵy qandaı klýbtar olıgarhtarǵa beriledi?Otandyq fýtbol klýbtarynyń kommersııalyq baǵytqa qaraı kósh túzeýi bıyl júıeli júzege asyryla bastady. Bul máseleni Prezıdent bıylǵy Joldaýynda da aıtyp ótken bolatyn. Básekelestikti qorǵaý jáne damytý agenttiginiń habarlaýynsha, «Astana», «Atyraý», «Ordabasy», «Turan», «Kaspıı» fýtbol klýbtary da jekeshelendirýge usynylǵan uıymdardyń tiziminde tur.